Búgin elimizdiń basym bóliginde qolaısyz aýa raıy kútiledi. Shyǵysta qar aralas jańbyr jaýyp, soltústik pen batysta burshaq túsýi yqtımal. Al ońtústikte kún ashyq bolady, dep habarlaıdy Egemen.kz.
Batys, ońtústik-batys jáne ońtústikte shańdy daýyl kóterilýi yqtımal. Soltústik, shyǵys jáne ortalyqta túnde jáne tańerteń tuman túsýi múmkin.
Sondaı-aq, sınoptıkterdiń boljamynsha, túnde Soltústik Qazaqstan oblysynyń soltústigi men shyǵysynda, Shyǵys Qazaqstan oblysynyń shyǵysy, batysy jáne soltústiginde, Aqmola oblysynyń batysy, soltústigi men ortalyǵynda topyraq betinde 2 gradýsqa deıin aıaz kútiledi.
Astanada kún bultty bolady. Kúndiz aýa temperatýrasy +20…+22°C, jel 3–8 m/s. Almatyda kún aýyspaly bultty, aýa temperatýrasy +23…+25°C, jel 3–8 m/s. Al Shymkent: kún ashyq, kúndiz +32…+34°C, jel 8–13 m/s, ekpini 15–20 m/s.