2020 jyly RBK Bank-ten 144 mıllıard teńge jymqyrdy dep sottalǵan burynǵy bankır Jomart Ertaev túrmeden shyqty. Aqparatty Ishki ister mınıstrliginiń Qylmystyq-atqarý júıesi komıteti rastady, dep habarlaıdy Egemen.kz.
Komıtet habarlaǵandaı, Ertaev sot úkimine sáıkes qylmystyq-atqarý júıesi mekemesinde jazasyn ótep jatqan.
«Sot sheshiminiń negizinde oǵan amnıstııa aktisi qoldanylyp, soǵan baılanysty ol bosatyldy. Qosymsha aıta ketsek, sottalǵandarǵa qatysty isterdi qaraý jáne sheshim qabyldaý sottyń quzyretine jatady», dedi QAJK-de.
Sonymen qatar, Ertaevty ári qaraı baqylaý jáne qadaǵalaý úshin probasııa qyzmetine tirkegenin atap ótti.
Eske sala keteıik, 2020 jyldyń qarashasynda burynǵy bankır Jomart Ertaev Bank RBK-ten 144 mıllıard teńge urlaǵany úshin 11 jylǵa bas bostandyǵynan aıyrylǵan. Onymen birge taǵy 35 adam sottalǵan edi.
Keıinirek Ertaev taǵy bir qylmystyq is boıynsha sottaldy. Bul joly ol Bank RBK men Qazaq Banki, sondaı-aq Eýrazııalyq bankten nesıe aqshasyn jymqyrǵany úshin sottaldy. Osy is boıynsha sot Ertaevtyń taǵy tórt sybaılasyna úkim shyǵardy. Sondaı-aq sottalǵandardan bankterge iri somadaǵy aqshany qaıtarý mindetteldi (Bank RBK-ke shamamen 98 mıllıard teńge, Qazaq Banki-ge 46 mıllıard teńgeden astam, Eýrazııalyq bankke 24 mıllıard teńgeden kóp).
2021 jyldyń naýryzynda sot Jomart Ertaevqa qatysty alǵashqy qylmystyq is boıynsha jazany jeńildetti. 11 jyldyń ornyna 9 jyl taǵaıyndalǵan edi.