Serbııalyq Numbeo onlaın-platformasy álem qalalarynyń turmys shyǵyndaryn salystyryp, bıylǵy eń qymbat shaharlardyń reıtıngin jarııalady. Baǵalaý kezinde turǵyndardyń kúndelikti shyǵyndary – azyq-túlik, kólik, kommýnaldyq qyzmet jáne meıramhanadaǵy baǵalar eskerildi. Negizgi kórsetkish retinde Nıý-Iorktegi ómir súrý quny 100 ballǵa teń dep alyndy, dep habarlaıdy Egemen.kz.
Reıtıng boıynsha Shveısarııa kósh bastap tur. Eldiń alty birdeı qalasy Nıý-Iorkten qymbat sanaldy. Birinshi orynda – Sıýrıh (112,5 ball). Mundaı nátıjege ulttyq valıýtanyń qymbattyǵy men joǵary jalaqy áser etken. Sol sebepti Jeneva, Bazel, Lozanna, Lýgano jáne Bern de tizimge kirdi. Shveısarııa qymbat el bolǵanymen, joǵary ómir sapasy, medısınasy, ınfraqurylymy jáne tabıǵatymen erekshelenedi.
Tizimge AQSh-tyń birneshe iri qalasy da engen. Nıý-Iork – ómir qymbattyǵymen qatar, múmkindikterimen de áıgili qala. San-Fransısko men San-Hose – Kremnıı alqabynyń ortalyǵy, munda startaptar men IT alyptarynyń shoǵyrlanýy baǵany ósirgen. Sıetlde de joǵary tabysty mamandardyń kóptigi turǵyn úı men qyzmet qunyn qymbattatyp otyr. Gonolýlý bolsa, geografııalyq ereksheligine baılanysty qymbat qala sanalady: azyq-túlik pen taýarlar aralǵa áýe jáne teńiz arqyly jetkiziledi.
Islandııa astanasy Reıkıavık te eń qymbat qalalardyń qatarynda. Sebebi elge azyq-túliktiń basym bóligi syrttan ákelinedi. Týrızmniń damýy qonaqúı men meıramhana baǵasynyń qymbattaýyna áser etken.
Azııada Sıngapýr erekshe kózge túsedi. Indeksi – 85,3. Munda kólikke qoıylǵan memlekettik shekteýler men qymbat baspana ómir qunyn ósirip tur. Degenmen qaýipsizdik pen qyzmet sapasy óte joǵary deńgeıde.
Skandınavııadan Norvegııanyń astanasy Oslo reıtıngke endi. Joǵary salyqtar áleýmettik qoldaý arqyly ótelse de, týrıster úshin qala qymbat bolyp sanalady.
Al Ulybrıtanııadan London bul tizimnen tys qalǵan joq. Qalanyń qymbattyǵyna halyqaralyq kompanııalardyń kóptep ornalasýy jáne turǵyn úıge joǵary suranys basty sebep. Ortalyqtaǵy páter baǵasy men jaldaý aqysy tabystyń basym bóligine para par.