Talǵar qalasynda er adamdy atyp óltirip, jas balany urlap áketken qylmys tirkeldi, dep habarlaıdy Egemen.kz.
Oblystyq polısııa departamentiniń málimetinshe, oqıǵa kezinde qylmysqa kúdikti men jábirlenýshi tarap (balanyń anasy – red.) buryn jaqyn qarym-qatynasta bolǵan. Keıin olardyń arasynda janjal týyndaǵan.
Tergeý boljamyna sáıkes, janjal kezinde kúdikti áıeldiń týǵan baýyryna ańshy myltyǵynan oq atqan. Er adam oqıǵa ornynda kóz jumdy. Qylmystan soń kúdikti jas balany alyp, belgisiz baǵytqa qashyp ketken.
«Kúdiktiniń jeke basy men júrgen jeri anyqtaldy. Ony ustaý boıynsha jedel sharalar qabyldanyp jatyr. Sonymen qatar bolǵan oqıǵanyń barlyq mán-jaıyn anyqtaý úshin keshendi tergeý amaldary júrgizilýde», – dep málimdedi polısııadan.
Qazirgi ýaqytta atalǵan faktiler boıynsha kisi óltirý jáne bala urlaý derekteri boıynsha qylmystyq ister qozǵaldy.