Senat depýtaty Zákirjan Kýzıev Memleket basshysynyń Joldaýyna qatysty pikir bildirip, aýyl sharýashylyǵy salasynda qolǵa alynǵan jańa bastamalardyń mańyzdylyǵyna toqtaldy, dep jazady Egemen.kz.
Senatordyń aıtýynsha, agrarlyq ǵylym men aýyl sharýashylyǵyn qoldaý tetikterin jetildirý – elimizdiń azyq-túlik qaýipsizdigin qamtamasyz etýdiń basty joly.
«Búgin biz Joldaýdan agrarlyq tehnologııaǵa baılanysty kóp máseleni estidik. Eń bastysy – sýbsıdııalaý endi biryńǵaı platforma arqyly júrgiziledi. Burynǵydaı ár salaǵa bólek berilmeı, ortaq júıege kóshirildi. Bul júıe ashyqtyqty qamtamasyz etedi jáne sharýalardyń senimin arttyrady», dedi Zákirjan Kýzıev.
Ol sondaı-aq aýyl sharýashylyǵy nesıelerin sýbsıdııalaý tetikterine erekshe toqtaldy.
«Qazir «QazAgro» arqyly agrarlyq nesıe 5 paıyzdyq mólsherlememen sýbsıdııalanyp jatyr. Bul sharýalar úshin úlken jeńildik ári qoldaý. Burynǵydaı joǵary paıyzben nesıe alyp, shyǵynǵa batý qaýpi seıiledi. Mundaı qadamdar aýyldaǵy eńbek adamyn yntalandyryp, salaǵa jańa serpin beredi», dedi depýtat.
Senatordyń aıtýynsha, sýbsıdııalaý júıesiniń jańa úlgisi aýyl sharýashylyǵynda uzaq jyldardan beri qordalanǵan máselelerdi sheshýge múmkindik beredi.
«Aýyldaǵy negizgi túıtkilderdiń biri – qarjylandyrýǵa qol jetkizýdegi teńsizdik bolatyn. Endi biryńǵaı júıeniń arqasynda ádildik ornap, sharýalardyń jaǵdaıy jaqsarady dep senemin. Bul qadamdar Prezıdenttiń agrarlyq ǵylym men óndiristi tyǵyz baılanystyrý, aýyl eńbekkerlerin qoldaý jónindegi tapsyrmalaryna tolyq sáıkes keledi», dedi ol.
Zákirjan Kýzıev Joldaýda kóterilgen bastamalardyń barlyǵy aýyl sharýashylyǵyn jańa deńgeıge kóterýge baǵyttalǵanyn atap ótti. Onyń pikirinshe, agrarlyq ǵylymdy damytý, sýbsıdııalaý júıesin jetildirý jáne qoljetimdi nesıe berý – eldiń azyq-túlik qaýipsizdigi men ekonomıkalyq turaqtylyǵynyń kepili.