Jetisý oblysy ákimdiginiń qoldaýymen B.Rımova atyndaǵy Taldyqorǵan drama teatry 12 qyrkúıekte 50 jyldyq mereıtoıyn atap ótpek. Mereıtoı aıasynda qazaq teatr óneriniń dara tulǵasy, Halyq ártisi, KSRO jáne Qazaqstannyń Memlekettik syılyǵynyń laýreaty, Qyrǵyzstannyń eńbek sińirgen mádenıet qaıratkeri Bıken Rımova atyndaǵy «Biken» III halyqaralyq teatr festıvali uıymdastyrylady.
Bul óner merekesiniń negizgi maqsaty – teatr ujymdary arasyndaǵy shyǵarmashylyq baılanysty arttyrý, kásibı yntymaqtastyqty damytý. Sonymen qatar festıval qazaq mádenıetinde óshpes iz qaldyrǵan Bıken Rımovanyń esimin máńgi este qaldyrýǵa baǵyttalǵan. Uıymdastyrýshylardyń aıtýyna qaraǵanda, atalǵan is-shara jas rejısserler men akterlerdiń, dramatýrgter men sýretshilerdiń jańa býynyn qoldap, olardyń kásibı damýyna serpin beredi.
Halyqaralyq deńgeıdegi festıval 12–17 qyrkúıek aralyǵynda Taldyqorǵanda ótedi. Úshinshi ret jalaýyn kótergeli otyrǵan óner dodasyna Grýzııa, Qyrǵyzstan, О́zbekstan jáne elimizdiń túkpir-túkpirinen kelgen toǵyz teatr ujymy qatysady. Bul qatysýshylar shyǵarmashylyq izdenisteri men tyń qoıylymdaryn kópshilik nazaryna usynbaq.
Festıvaldiń synshylar alqasynda elge tanymal óner qaıratkerleri bar. Olardyń qatarynda Memlekettik syılyqtyń laýreaty, Qyrǵyz Respýblıkasynyń eńbek sińirgen ártisi, rejısser ári prodıýser Doshan Joljaqsynov, teatrtanýshy, ónertaný kandıdaty, Qazaq ulttyq óner akademııasynyń professory Merýert Jaqsylyqova, Qazaqstannyń halyq ártisi, rejısser-dramatýrg Talǵat Temenov, belgili teatrtanýshy, Tatarstan Respýblıkasy Mádenıet mınıstriniń keńesshisi Nııaz Iglamov, Shota Rýstavelı atyndaǵy Tbılısı memlekettik teatr jáne kıno ýnıversıtetiniń professory, ónertaný doktory Gıorgı Skıtıshvılı bar.
Mereıtoı aıasynda ótetin bul festıval elimizde teatr óneriniń damýyna jańa serpin berip, halyqaralyq deńgeıdegi shyǵarmashylyq baılanysty nyǵaıtýǵa yqpal etpek.