Prezıdenttiń 2025 jylǵy Joldaýyn júzege asyrý jónindegi sharalarǵa arnalǵan Úkimet otyrysynda Premer-mınıstr Oljas Bektenov jańa ınvestısııalyq kezeńdi bastaý qajettigin atap ótti, dep habarlaıdy Egemen.kz.
«Prezıdent Joldaýda jańa ınnovasııalyq jáne ınfraqurylymdyq ózgeristerdi aıqyndap berdi. Qoıylǵan mindetterdi sheshý úshin, eń aldymen, elimizge tartylatyn ınvestısııalar aǵynyn arttyrý qajet. Memleket basshysy jańa ınvestısııalyq kezeńdi bastaý qajettigin atap ótti. Sondyqtan biz óte qysqa merzimde ınvestorlarmen biryńǵaı ózara is-qımyl tetigin quryp, ınvestısııa tartý júıesin túbegeıli jańartýǵa tıispiz», dedi Oljas Bektenov.
Premer-mınıstr atap ótkendeı, ınvestısııalar aıasynda tartylǵan árbir teńge normatıvtik aktilermen jáne ońtaıly tájirıbemen bekitilgen myqty kepildiktermen qorǵalýǵa tıis. Sonymen qatar jasandy ıntellekt (JI) tehnologııalaryn qoldaný ınvestısııalardy barynsha tıimdi paıdalanatyn salalardy aıqyndaýǵa jáne olardyń praktıkalyq tájirıbesin ekonomıkanyń basqa salalaryna taratýǵa múmkindik beredi.
Sondaı-aq ekonomıkanyń joǵary tehnologııalyq salalaryna ınvestısııa tartý úshin arnaıy is-sharalar, onyń ishinde preferensııalar qarastyrylýy qajet. Premer-mınıstr bul sharalardyń Memleket basshysynyń tapsyrmasy boıynsha ázirlenip jatqan tıisti baǵdarlamaǵa negiz bolatynyn atap ótti.