13–21 qyrkúıek aralyǵynda Japonııanyń bas shahary Tokıoda jeńil atletıkadan álem chempıonatynyń jalaýy jelbireıdi. Jarysta 49 júlde jıyntyǵy sarapqa salynady. Baq synaýshylar qatarynda elimizdiń sportshylary da bar.
Keńes odaǵy kezeńinde elimizdiń jeńil atletteri myqty bolǵanyn barsha jurt jaqsy biledi. Sporttyń osy túrin serik etken otandastarymyzdyń baıraqty básekelerden oljasyz oralǵan kezderi sırek. О́zgelerdi aıtpaǵanda, qazaqtyń qos tarlany, áıgili jelaıaqtar Ǵusman Qosanov pen Ámın Tuıaqovtyń jeldeı esken kezderi áli de egde tartqan jankúıerlerdiń jadynda.
Álem chempıonattaryna keler bolsaq, bul jarystyń shymyldyǵy 1983 jyly Helsınkıde túrildi. Sýomı elinde uıymdastyrylǵan dúbirli dodada KSRO quramasy 4h100 estafetalyq saıysta qola medaldi ıelendi. Komanda sapynda qaraǵandylyq Vladımır Mýravev ta óner kórsetti.
1987 jylǵy álemdik dodany Rım qabyldady. «Máńgilik qalada» Mýravevtiń qanjyǵasy qaıta maılandy. Sodan tórt jyl buryn estafetada jeńip alǵan qolasyn ol osy joly kúmiske almastyrdy. Qyzyljarlyq marafonshy Zoıa Ivanova kúmis alsa, úsh qarǵyp sekirýde shymkenttik Oleg Sakırkın qolaǵa qol sozdy.
Táýelsiz elimizdiń qorjynyna alǵashqy júldeni syryqpen sekirýshi Grıgorıı Egorov saldy. 1993 jyly Shtýtgardta ótken álem chempıonatynda shymkenttik sańlaq 5 metr 90 santımetrlik mejeni baǵyndyrdy. Jerlesimiz tek Ýkraınanyń dańqty sportshysy Sergeı Býbkadan qalyp qoıdy. Álemdik rekordty 35 márte jańartqan jampoz Egorovtan 10 santımetrge bıik sekirdi.
1995 jyly Geteborgta 100 metrge kedergiler arqyly júgirgen Olga Shıshıgına kúmispen kúpteldi. Almatylyq arý AQSh-tyń aty ańyzǵa aınalǵan jelaıaǵy Geıl Dıversten ǵana qalyp qoıdy. 1997 jyly Afınadan, 1999 jyly Sevılıadan qorjynymyz bos qaıtty. 2001 jyly Edmontonda Shıshıgına úshinshi oryndy qanaǵat tutty. Bul joly jerlesimiz qos amerıkalyq juldyz – Andjanet Kırklend pen Geıl Dıversten oza almady. 2003 jyly Sen-Denı men 2007 jyly Osakada onsaıysshy Dmıtrıı Karpovtyń asyǵy alshysynan tústi. Qaraǵandynyń jampozy joǵaryda atalǵan jarystyń ekeýinde de qola medaldi qorjynǵa saldy.
2011–2017 jyldar aralyǵynda úsh qarǵyp sekirýshi Olga Rypakova atoı saldy. Tegýde ol ýkraınalyq Olga Saladýhany alǵa jiberip, kúmispen kúpteldi. Jarysta О́skemenniń týmasy 14,89 metrlik nátıje kórsetti. Beıjiń men Londonda ol qolaǵa qol sozdy. Odan bólek, Rypakovanyń qorjynynda Olımpııa oıyndarynyń tolyq júlde jıyntyǵy bar. Jabyq ǵımarattaǵy álem chempıonatynda da jerlesimiz dál sondaı kórsetkishke qol jetkizdi. Sondaı-aq Azııa oıyndarynda tórt ret top jaryp, kóptegen asa iri halyqaralyq jarystarda daralandy. Bir sózben aıtsaq, Olganyń esimi otandyq jeńil atletıka tarıhyndaǵy eń tabysty sportshy retinde tarıhta qaldy.
2022 jyly Kenııanyń birneshe sportshysy elimizdiń azamattyǵyn alyp, dúbirli dodalarda bizdiń eldiń atynan synǵa túse bastady. Solardyń arasynan Nora Djerýto ozyp shyǵyp, úkilegen úmitimizdi aqtady. Sol jyly AQSh-tyń Iýdjın qalasynda uıymdastyrylǵan álem chempıonatynda 3000 metrge kedergiler arqyly júgirgen «qara marjan» altynnan alqa taqty. Noranyń nátıjesi – 8.53,02. Osylaısha, bas júldeni oljalap qana qoımaı álemdik rekordty da jańartty.
2023 jyly Býdapeshttegi básekede jeńil atletterimiz taǵy da jerge qaratty. Majarstannyń astanasynda shymyldyǵy túrilgen keıingi álem chempıonaty AQSh quramasynyń aıqyn jeńisimen aıaqtaldy.
Sanaýly kúnderden keıin Japonııada jalaýy jelbireıtin jarysta elimizdiń bes jeńil atleti óner kórsetedi. Olar – Nora Djerýto (3000 metrge kedergiler arqyly júgirý), Deızı Djempkemeı (3000 metrge kedergiler arqyly júgirý, 10 000 metrge júgirý), Iаsmına Toqsanbaeva (sporttyq júris, 20 shaqyrym), Galına Iаkýsheva (sporttyq júris, 35 shaqyrym), Polına Repına (sporttyq júris, 35 shaqyrym). Mine, osy bes sportshymyzdyń eń bolmaǵanda bireýi jeńis tuǵyryna kóterilse, sonyń ózi úlken olja bolmaq.