Senat depýtattary Nurtóre Júsip pen Aınur Arǵynbekova Astanada halyqaralyq konferensııa qatysýshylarymen kezdesý ótkizdi. Shara «Ortalyq Azııadaǵy múgedektigi bar áıelderdiń múddelerin eskere otyryp, ornyqty damý maqsattaryna qol jetkizý» taqyrybynda ótti. Forýmǵa Qazaqstan, Fınlıandııa, Tájikstan, Qyrǵyzstan jáne basqa elderdiń delegattary qatysyp, áleýmettik saıasat pen múgedektigi bar áıelder men qyzdardyń quqyqtaryn qorǵaý máselelerin talqylady, dep habarlaıdy Egemen.kz.
Kezdesý barysynda senatorlar elimizdegi áleýmettik saıasattaǵy jetistikterge toqtalyp, múgedektigi bar áıelder men qyzdardyń quqyqtaryn qorǵaýdaǵy memlekettik bastamalardy atap ótti.
Nurtóre Júsiptiń sózinshe, Qazaqstanda zańnamalyq baza qalyptasyp, áleýmettik qorǵaý baǵdarlamalary iske asyrylýda, sonymen qatar bilim berý, densaýlyq saqtaý jáne jumyspen qamtý salalarynda naqty oń ózgerister baıqalady.
«XXI ǵasyrdyń jahandyq kún tártibi jaǵdaıynda barlyq toptaǵy halyq úshin teń quqyqtar men múmkindikterdi qamtamasyz etý máselesi erekshe mánge ıe. 2030 jylǵa deıingi ornyqty damý salasyndaǵy kún tártibin halyqaralyq qaýymdastyqtyń qabyldaýy memleketter úshin áleýmettik jáne ekonomıkalyq saıasatty qalyptastyrýda baǵdar boldy. Qazaqstan osy qundylyqtardy bólise otyryp, ODM-dy ulttyq strategııalyq basymdyqtarǵa engizdi. Sonymen qatar, elimizdiń 2015 jyly Múgedekterdiń quqyqtary týraly konvensııany ratıfıkasııalaýy memlekettik saıasattaǵy jańa kezeńdi aıqyndady. Qazir Qazaqstanda 2025 jylǵa deıin múgedektigi bar adamdardyń quqyqtaryn qamtamasyz etý jáne ómir sapasyn jaqsartý jónindegi ulttyq jospar, 2030 jylǵa deıingi otbasylyq jáne genderlik saıasat tujyrymdamasy, sondaı-aq qoljetimdi orta qurýǵa jáne múgedektigi bar áıelder men qyzdardyń múmkindikterin keńeıtýge baǵyttalǵan salalyq baǵdarlamalar júzege asyrylýda», dedi Nurtóre Júsip.
Sondaı-aq senator múgedektigi bar áıelder men qyzdardyń quqyqtaryn qorǵaýdyń ornyqty damýǵa jetýdiń mańyzdy sharty ekenin atap ótip, aldaǵy ýaqytta ınklıýzıvti saıasatty damytýǵa, áleýmettik qorǵaý mehanızmderin jetildirýge jáne árbir azamat óz áleýetin júzege asyra alatyn tolerantty qoǵam qalyptastyrýǵa kúsh salatynyn jetkizdi.
Kezdesýdiń sońynda halyqaralyq sarapshylarmen tájirıbe almasý men yntymaqtastyqty keńeıtýdiń mańyzdylyǵy aıtylyp, sheteldik mamandardyń qatysýy birlesken jumysqa jańa múmkindikter ashatyny atap ótildi.