Endi Túrkistan qalasyndaǵy birqatar mektepte oqýshylar sabaq barysynda uıaly telefon qoldanbaıdy. Qalalyq bilim bóliminiń «Smartfonsyz mektep» jobasy ata-analardan bastap, ustazdar men balalardan da qoldaý tapty, dep habarlaıdy Egemen.kz.
Mektepke kelgen ár synyptaǵy oqýshylarǵa telefon saqtaıtyn qorapsha ázirlengen. Bilim alýshylar telefondy sabaqtan tys, úzilisterde paıdalana alady. Iаǵnı sabaq bitkennen keıin jáne sabaqtan tys ýaqytta oqýshy óziniń uıaly telefonyn alyp, ata-anasyna habarlasa alady.
Oqýshylar sabaq barysynda muǵalim bergen materıaldy tolyq meńgerip, óziniń bilimin shyńdaýy qajet. Mamandar bul qadamnyń basty maqsaty – bilim sapasyn arttyrý, oqýshylardyń oılaý qabileti men psıhologııalyq densaýlyǵyna oń áser etý ekenin aıtady.
Osyndaı naqty erejeler men baqylaý sharalaryn engizý smartfondardyń bilim berý ortasyna tıgizetin zııanyn azaıtyp, sapaly bilim men tárbıege nazar aýdarýǵa yqpal etedi.