Almatyda 8, 10 jáne 12 jasqa deıingi balalar arasynda shahmattan álem chempıonaty - FIDE World Cadet Chess Championships 2025 bastaldy. Týrnırdi ótkizý Qala kúnin merekeleýge sáıkes keldi. Saltanatty ashylý rásimi Balýan Sholaq atyndaǵy sport saraıynda ótti. Oǵan QR Premer-Mınıstriniń orynbasary Ermek Kósherbaev, Almaty ákimi Darhan Satybaldy, FIDE prezıdenti Arkadıı Dvorkovıch jáne Qazaqstan shahmat federasııasynyń prezıdenti Tımýr Týrlov qatysty, dep jazady Egemen.kz.
Chempıonatqa 88 elden 851 jas shahmatshy, onyń ishinde Qazaqstannyń 231 ókili qatysady. Olardyń ishinde 47 almatylyq bar. Bul qalany elimizdiń jas shahmatshylaryn daıarlaıtyn basty ortalyqtarynyń birine aınaldyrady.
QR Premer-Mınıstriniń orynbasary Ermek Kósherbaevtyń aıtýynsha, Qazaqstanda shahmat sporttyń bir túri ǵana emes, bilim berýdiń mańyzdy bóligi retinde qarastyrylady. «Prezıdent Qasym-Jomart Toqaevtyń qoldaýynyń arqasynda shahmat qarqyndy damyp keledi. О́tken jyldyń ózinde bizdiń sportshylar halyqaralyq arenada 160 medal jeńip aldy. Búgin shahmatty bastaýysh synyptardyń mektep baǵdarlamasyna engizý máselesi qarastyrylyp otyr. О́ıtkeni bul oıyn balalardy logıkaǵa, sabyrǵa, zeıinge jáne strategııalyq oılaýǵa úıretedi. Bul memlekettiń zııatkerlik ult qalyptastyrý baǵytyna sáıkes keledi», - dedi ol. О́z kezeginde Almaty ákimi Darhan Satybaldy osyndaı aýqymdy týrnırdi ótkizý qala úshin ǵana emes, búkil el úshin mańyzdy oqıǵa ekenin atap ótti.
«Búginde Almaty shahmat álemindegi eń aıtýly jarystardyń birin ótkizip otyr. Ásirese, chempıonattyń qala kúni qarsańynda ótýi erekshe mánge ıe. Bul biz úshin qurmet ári zor jaýapkershilik. Túrli elden kelgen 850-den astam bala osynda jınalyp, ózderiniń zerdesin, talantyn jáne tabandylyǵyn kórsetip otyr. Shahmat – halyqtardy biriktiretin, zııatkerlik bolashaǵyn qalyptastyratyn ámbebap til. Almaty qatysýshylar úshin qonaqjaılyqtyń, dostyqtyń jáne jańa jeńisterdiń qalasy bolyp qala beretinine senemin», – dedi Almaty ákimi.
Álem chempıonaty 30 qyrkúıekke deıin jalǵasady. Jarys uldar men qyzdar arasynda 8, 10 jáne 12 jasqa deıin alty sanat boıynsha jeńimpazdardy anyqtaıdy. Barlyǵy 11 týr ótedi, olar shveısarlyq júıe boıynsha klassıkalyq ýaqyt baqylaýymen (90+30) uıymdastyrylady. Jarys baǵdarlamasynan bólek, jas shahmatshylardy Shymbulaqqa ekskýrsııa jáne mádenı sharalar qamtylǵan demalys kúni, sondaı-aq Satbayev University-de ótetin «Shahmat bilim berýde» atty halyqaralyq konferensııa kútip tur.
Byltyr kadetter arasyndaǵy álem chempıonaty Italııanyń Montesılvano qalasynda ótip, 77 elden 700-den astam shahmatshy qatysqan edi. Almatyda qatysýshylar sany 88 elden 851-ge jetip, týrnır tarıhyndaǵy rekord ornatty. Bul Qazaqstannyń qabyldaýshy tarap retindegi joǵary senimine dálel.
Álem chempıonatynyń Almatyda ótýi Qazaqstandy álemdik shahmattyń jańa ortalyqtarynyń biri retinde nyǵaıtyp, elde bul sporttyń qarqyndy damyp kele jatqanyn aıshyqtaı túsedi.