26 jyl ańsaǵan altyn medal

Bastapqy básekelerde Maksvell Hopper Blek (AQSh) pen Mel­kame Fetıneni (Izraıl) esh qı­nalmaı utqan Aıdos Sultanǵalı shı­rek fınalda Olımpıada men Azııa oıyn­darynyń qola júldegeri, qur­lyq chempıony Se Ýng Rımen (Soltústik Koreıa) kúsh synasty. «Taktıkalyq turǵydan óte saýatty uıymdastyrylǵan aıqas sál ǵana basymdyqpen jerlesimizdiń paı­da­syna sheshildi. Jartylaı fınalda grý­zııalyq Amıran Shavadzege shań qap­tyrdy – 10:2.

Fınalda qazaqtyń qaısar uly О́zbek­stannyń óreni, 23 jastaǵy balýandar ara­syndaǵy álem chempıony Álisher Ganıevti merziminen buryn, nebári 1 mınýt 7 sekýndta tas-talqan etip utty. Sóıtip, Aıdos Sultanǵalı táýelsiz eli­mizdiń tarıhyn­da osyndaı dárejege jetken tórtinshi ba­lýan retinde esi­min sport shejiresine al­tyn áripter­men jazdy. Aıdos Sultanǵa­lıǵa deıin bul beles Iýrıı Melnıchenko men Mhıtar Manýkıanǵa eki márte baǵynsa, Baqtııar Baıseıitov bir ret bas júldeni qanjyǵasyna baılady.

Grek-rım kúresi sheberleri alǵashqy jarys kúni tórt júlde jıyntyǵyn sarapqa saldy. Álmır Tólebaev (82 kg) pen Álimhan Syzdyqov (130 kg) bastapqy básekelerinde súrindi. Marlan Muqashev beldesýdiń alǵashqy mınýttarynda Eýropa chempıony Artem Delıanýdy (Moldova) 9:1 esebimen utyp jatty. Marlanǵa endi bir upaı alsa jetkilikti edi. Biraq qazaq balýany sol basymdyǵyn saqtap qala almady. Bir mezette Artem ony jyǵyp aldy da, kilemniń ústinde shyr aınaldyrdy. Qandasymyz durys qorǵana almady. Upaı sanyn lezde 14-ke jetkizgen Delıaný jeńisti julyp áketti.

77 kg salmaqta kúresken Demeý Jady­raev alǵashynda Ionnı Sarkınnen (Fınlıandııa) men Aleks Ilıchke (Ser­bııa) san soqtyrǵanymen, shırek fınal­da Nao Kýsakaǵa (Japonııa) jol ber­di. Dál osy balýan byltyr Parıjde Demeýdi Olımpıadanyń altynynan aıyrǵany esimizde. Zagrebte Boran­bek Qońyratovtyń shákirti ketken eseni qaıtara almady. Jubanysh beldesýin­de Igor Bychkovtan (Ýkraına) basym túsken Jadyraev úshinshi oryn úshin tartysta álem chempıonatynyń kúmis júldegeri, Eýropa chempıony Robert Atılla Frıchpen (Majarstan) sheber­lik baıqasty. Beldesý barysynda edáýir upaı aıyrmashylyǵymen alda kele jatqan Demeý odan keıin boldyryp qaldy. Sheshý­shi tusta shıraq qımyldaǵan Frıch jeńis toıyn toılady – 6:5.

«Klassıkterdiń» ekinshi jarys kúni 97 kg salmaq dárejesinde synǵa túsken Rahat Berjanov Georgıı Melııanyń (Grýzııa) aldynda dármensizdik tanytty. 72 salmaqtaǵy Mereı Máýlethanov alǵa­shynda Mattıas Lapastıdi (Fınlıandııa) utty. Kelesi kezeńde álem chempıony, jarystyń eki dúrkin qola júldegeri Álı Arsalannan (Serbııa) aılasyn asyryp, óz kórermenderin taǵy bir qýantty. Odan keıin Olımpııa oıyndarynyń eki dúrkin fınalısi, Eýropa chempıonatynyń eki dúrkin kúmis júldegeri Parvız Nasıbovty (Ýkraına) jolynan yǵystyrdy. Bul básekeniń taǵdyryn bir ǵana upaı shesh­ti. Jartylaı fınalda álem men Eýropa chempıony Ibragım Ganeden (Fransııa), úshinshi oryn úshin beldesýde jastar arasyndaǵy álem birinshiliginiń jeńimpazy, Azııa oıyndarynyń qola júl­degeri, qurlyq chempıony Saed Da­nııal Sohrabıden (Iran) jeńildi.

Sońǵy kúni taǵy úsh salmaqta sa­ıystar ótti. 63 kg salmaqta synǵa túsken Erjet Jarylqasyn shırek fınalda О́zbek­stannyń týy astynda óner kórsetetin Aıt­jan Qalmahanovtan utyldy. Qan­dasy­myzdyń fınalǵa shyqqanynyń arqa­synda Erjet jubanysh beldesýine qaty­syp, Aleksandr Grýshınnen (Ýkraına) je­ńildi. Dál sondaı jaǵdaıdy Islam Evloev (87 kg) ta basynan keshirdi. Alǵashqy eki aınalymda otandasymyz álem chempıony Lasha Gobadze (Grýzııa) men jasópirimder men jastardyń álem birin­shilikterinde jeti ret jeńis tuǵyry­na kóteril­gen Vazgen Nazarıandy (Arme­nııa) jo­lynan yǵystyrdy. Biraq shırek fı­nal­da Eýropa chempıony Aleksandr ­Ko­ma­­­rovtan (Serbııa) aılasyn asyra al­ma­dy. Jubanysh básekesinde Peıton Dje­kobs­sondy (AQSh) jyqty. Biraq odan ári­ge 20 jastaǵy jerlesimizdiń shama­sy jet­pedi. Qola medal úshin tartys­ta Mı­lad Álırızaevtan (Reseı) jeńildi. 67 kg sal­maqta beldesken Dinmuhammed Qoshqar Slavık Galstıannyń (Arme­nııa) ońaı oljasyna aınalyp, birinshi kezeńnen keıin-aq kórermender qataryna qosyldy.

Sóz oraıynda, jarysta О́zbekstannyń ánuranyn shyrqatqan Aıtjan Qalmaha­novtyń qazaq ekenin aıta ketken abzal. Kórshiles memlekette týyp-ósken, ne­bári 19 jastaǵy qandasymyz barlyq qar­sylasyn utyp, álem chempıony atandy. 

* * *

Áıelder kúresinen elimizdiń toǵyz sportshysy baq synady. Alaıda olar­dyń birde-bireýi júldege ilige almady. Eń ókinshtisi, bozkilemge shyqqan jerlesterimizdiń arasynan jalǵyz Vık­torııa Hýsaınova (59 kg) ekinshi kezeńge jetti. Bul mejede ony túrkııalyq Altdjın Togtoh toqtatty. Qalǵan sportshylarymyz tusaýkeser kezdesýlerinde súrindi. Atap aıtsaq, Svetlana Akıncheva (50 kg) Mengen Vonnan (Soltústik Koreıa), Zeınep Baıanova (53 kg) Soen Paktan (Ońtústik Koreıa), Zúlfııa Iаhıarova (55 kg) Elvıra Kamaloǵlydan (Túrkııa), Laýra Álmaǵambetova (57 kg) Djenna Hemııadan (Fınlıandııa), Tynys Dúbek (62 kg) Alısa Novasadtan (Polsha), Beıbit Seıdýáli (65 kg) Hıeneng Paktan (Ońtústik Koreıa), Jámılá Baqbergenova (72 kg) Nurzat Nurtaevadan (Qyrǵyzstan), Elmıra Syz­dyqova (76 kg) Enırka Rınaldıden (Italııa) utyldy.

Burymdylar básekesinde 29 jastaǵy Jámıla Baqbergenovanyń tusaý­keser kezdesýinde jeńilgeni qatty qynjyltty. Almaty oblysynyń týmasy keıingi tórt-bes jylda otandyq áıelder kúresin jal­ǵyz ózi órge súırep júr. 2021–2024­ jyl­dar ara­­­ly­ǵyn­da qatarynan tórt álem chem­­pıo­na­­­­tyn­­­da oljaǵa kenel­di. Bir már­te top ja­ryp, ­úsh ret kúmis­pen kúp­­teldi, bir ret qola ­aldy. Onyń syr­­­tynda Azııa chem­pıo­­­na­ty­nyń alty júl­desi taǵy bar (4 altyn, 1 kúmis, 1 qola). Hanch­joýdaǵy Azııa oıyn­­da­­rynda úzdik úshtikti túıindedi. Bul joly Jámıla al­ǵashqy aınalymda qyr­ǵyz­dyń jas ­daryny Nurzat Nurtaevaǵa jol berdi.