Qol kúresinen Bolgarııada ótip jatqan álem chempıonatynda 16 jastaǵy Ulbosyn Elmurat sensasııa jasady. Ol fınalda áıelder arasynda 13 márte tórtkúl dúnıeniń teńdessizi dep tanylǵan slovakııalyq Lıýsııa Debranovany aıqyn basymdyqpen utty. Onyń aldynda ǵana Ibragımder otbasynan shyqqan aǵaıyndy úsh sportshy – Beknur, Azamat, Ádilet bas júldeni oljalaǵan edi. Sondaı-aq Nursultan Aldan men Yrysty Orazhan da óz salmaq dárejelerinde chempıon atandy.
Taekvondodan Polshada shymyldyǵy túrilgen halyqaralyq týrnırde Nodıra Ahmetova kúmis medal enshiledi. Jartylaı fınalda bolgarııalyq Aleksandra Gıorgıevany utqan jerlesimiz sheshýshi synda ıspanııalyq Vıoletta Arrıbastan aılasyn asyra almady.
Fýtboldan elimizdiń áıelder quramasy aldaǵy aıda Ázerbaıjanǵa qarsy joldastyq kezdesý ótkizýdi josparlap otyr. Bul matchtar 24–27 qazan aralyǵynda Shymkenttegi Qajymuqan Muńaıtpasov atyndaǵy stadıonda ótedi.
Qazirde elimizdiń birqatar tennısshisi Qytaıda baq synap jatyr. Hanchjoýdaǵy ATR 250 týrnırinde Aleksandr Býblık aýstralııalyq Aleksandr Výkıch, chehııalyq Dalıbor Svrchınaǵa san soqtyryp, jartylaı fınalda kort qojaıyna Vý Ibındi 6:3, 6:3 esebimen qapy qaldyrdy. Endi Býblık bas júlde úshin tartysta fransııalyq Valenten Roıemen kúsh synasady. Aleksandr Shevchenko Chedýdegi jarystyń jartylaı fınalynda súrindi. Ony ıtalııalyq Lorenso Mýzettı toqtatty.
27 qyrkúıekte Ázerbaıjannyń Evlah qalasynda TMD oıyndarynyń alaýy tutanady. Bul jarysta bokstan elimizdiń jasóspirimder quramasynyń aǵa jattyqtyrýshysy Baǵdat Ońǵarbekov myna shákirtterine senim artyp otyr: 46 kg – Ańsar Úsenhan, 48 kg – Qorǵanbek Baltın, 50 kg – Aslan Jeńisbaev, 52 kg – Edige Nurqoja, 54 kg – Jalǵas Apbaz, 57 kg – Ulas Álimjan, 60 kg – Islam Súleımenoǵly, 63 kg – Aldııar Baıandınov, 66 kg – Ámir Ramadan, 70 kg – Daryn Tólegen, 75 kg – Tóreǵalı Seıdýllaev, 80 kg – Baýyrjan Álıakpar, + 80 kg – Erketań Jarqynbek.
Fýtboldan Qazaqstan Premer-lıgasynyń 8-týrynyń keıinge shegerilgen matchynda Almatynyń «Qaıraty» Ortalyq stadıonda Astananyń «Jeńisin» qabyldady. Báseke barysynda alǵashqy eki goldy 11, 37-mınýttarda Dastan Sátbaev soqty. Ekinshi kezeńniń basynda Islambek Qýat esep aıyrmashylyǵyn qysqartqanymen, 80-mınýtta brazılııalyq legıoner Rıkardıno oıynnyń núktesin qoıdy. Nátıjesinde, 3:1 esebimen jeńiske jetip, 52 upaı alǵan «Qaırat» jarys kestesinde jeke-dara kósh bastady. «Astana» klýbynyń almatylyqtardan eki upaıy kem.
Qurlyqtyq hokkeı lıgasynyń (QHL) kezekti týrynda «Barys» Mınskide jergilikti «Dınamoǵa» qarsy oınady. Báseke aıdyn ıeleriniń basymdyǵymen ótip, qaqpamyzǵa 42 soqqy jasady. Astanalyqtar segiz soqqymen ǵana shekteldi. Degenmen qaqpashynyń senimdi oıynynyń arqasynda negizgi ýaqytta esep ashylǵan joq. Overtaımda «Dınamo» sapyndaǵy amerıkalyq legıoner Sem Anas nysanany dál kózdep, komandasyna jeńis syılady – 1:0.