Túrkistan oblysynda belgilengen talaptarǵa saı kelmeıtin ónimder ımportynyń turaqty ósý tendensııasy eleýli alańdaýshylyq týǵyzady. О́ńirde tek tamaq ónimderi ǵana emes, sonymen qatar azyq-túlik emes taýarlar da baqylaýǵa alynǵan. Olardyń qatarynda jıi órt týdyratyn kabeldik ónimder, elektr aspaptary, qurylys materıaldary jáne basqa da ónimder bar, dep habarlaıdy Egemen.kz.
Bıyl jalpy memlekettik baqylaýmen 184 sýbekt qamtylyp, 9 mln teńgeden astam aıyppul salynǵan. Tekserý is-sharalarynyń 92%-y profılaktıkalyq sıpatta jáne qashyqtyqtan júrgizilgen. Tehnıkalyq retteý jáne metrologııa komıteti Túrkistan oblysy boıynsha departamentiniń basshysy Aset Týrebaevtyń málimdeýinshe, memlekettik baqylaý jumystary turaqty júrgizilýde. Departament tarapynan «QazCem» birlestiginiń aryzy boıynsha О́zbekstanda shyǵarylǵan sement ónimine berilgen jalǵan «sur» sáıkestik sertıfıkaty máselesine qatysty tıisti is-sharalar atqarylǵan. Naqtyraq aıtqanda, tehnıkalyq reglament talaptaryna sáıkes kelmeıtin О́zbekstanda shyǵarylǵan «CONCH» markaly sementine qatysty Jetisaı jáne Saryaǵash aýdandarynda jospardan tys tekserýler júrgizildi. Eki jaǵdaıda ónimniń jalǵan sáıkestik týraly sertıfıkatymen satylyp jatqandyǵy anyqtaldy. Nátıjesinde, 2 jeke kásipkerge jalpy somasy 920088 teńge mólsherinde ákimshilik aıyppul salynyp, buzýshylyqtardy joıý týraly nusqamalar berildi jáne 3577 dana sement ónimin aınalymǵa shyǵarýǵa tyıym salý sharalaryn qoldaný týraly qaýlylar shyǵaryldy. Jalǵan sáıkestik sertıfıkaty boıynsha taýardy jetkizýshige qatysty Shymkent polısııasyna ótinish joldanyp, qazirgi tańda qylmystyq is qaralyp jatyr.
Ishki naryqty arzan jáne sapasyz ımporttan qorǵaý máseleleri jónindegi ahýaldyq shtabtyń ekinshi otyrysynda oblys ákiminiń orynbasary Talǵat Qozbekov jaýapty tulǵalarǵa baqylaýdy kúsheıtý boıynsha birqatar tapsyrma berdi. Shekara mańyndaǵy ótkizý pýnktterinde veterınarııalyq jáne fıtosanıtarııalyq baqylaýdy úzdiksiz júrgizýdi qamtamasyz etýdi mindettedi.