Prezıdent Ǵylym jáne tehnologııalar jónindegi ulttyq keńestiń otyrysynda ǵalymdardyń aǵartýshylyq mıssııasyna erekshe nazar aýdardy, dep habarlaıdy Egemen.kz Aqordanyń baspasóz qyzmetine silteme jasap.
«Sizder ár salany tereń bilesizder. Atqarylyp jatqan jumystyń mán-jaıyn jaqsy túsinesizder. Sony jastarǵa aıtyp jetkizý kerek. Olardyń boıynda áleýmettik optımızm qalyptastyrý óte mańyzdy. Zaman kúrdeli bolsa da, bizdiń baǵytymyz – durys. Elimiz qıyndyqtyń bárin eńserip, úzdiksiz damyp keledi. Bes jylda Qazaqstannyń ishki jalpy ónimi 181 mıllıardtan 291 mıllıard dollarǵa kóbeıdi. Bıylǵy 8 aıdyń ózinde ekonomıkamyz 6,5 paıyzǵa ósti. Elimizdiń halyqaralyq rezervi men Ulttyq qordyń aktıvi 116 mıllıard dollardan asty. Sonyń ishinde halyqaralyq rezervimiz rekordtyq deńgeıge jetip, 54,6 mıllıard dollar boldy. Munyń bárin basqa memleketter, bedeldi uıymdar kórip otyr, moıyndap jatyr», dedi Qasym-Jomart Toqaev.
Memleket basshysy mysaly, Standard and Poor’s agenttigi buǵan deıin elimizdiń damýyn «turaqty» dep, endi «jaǵymdy» degen boljam jasap otyrǵanyn atap ótti.
«Syrt kóz – synshy». Álem qaýymdastyǵynyń Qazaqstanǵa degen senimi bizdiń durys jolmen kele jatqanymyzdy kórsetedi. Alaıda halyqaralyq reıtıngterde joǵary oryn ıelený – biz úshin maqsat emes, onyń ústine bul toqmeıilsýge sebep bola almaıdy. Biz muny túsinýimiz kerek. Bizdiń basty mindetimiz – halyqtyń ál-aýqatyn udaıy arttyrý jáne elimizdiń básekege qabilettiligin kúsheıtý. Dál sol sebepti biz qıyn da kúrdeli ózgerister arqyly reformalar júrgizemiz. Bul ońaı jol emes. Elimizdi basqasha órkendete almaımyz. Bárimizdiń maqsat-múddemiz – bir. Bul – Ádiletti, Qýatty, Taza ári Qaýipsiz Qazaqstandy qurý. Bul iske ǵalymdar qaýymy mol úles qosady dep senemin», dedi Memleket basshysy.