О́zara yntymaqtastyqtyń mańyzdy qyrlary talqylandy

Áz Naýryz qut-bereke ákelsin!

Keshe Astanada Qazaqstan, Reseı, Belarýs memleketteri basshylarynyń úsh­jaq­ty kezdesýi bolyp ótti. Osy basqosý qarsańynda Qazaqstan Prezıdenti Nursul­tan Nazarbaev Reseı Federasııasynyń Prezıdenti Vladımır Pýtınmen kezdesti. Kezdesý barysynda memleketter basshylary saýda-ekonomıkalyq, ınvestısııalyq, tranzıttik-kóliktik yntymaqtastyqtyń basymdyǵy bar salalaryn qarastyrdy. Qazaqstan men Reseı prezıdentteri, sondaı-aq, halyqaralyq jáne óńirlik kún tártibindegi ózekti máselelerge toqtaldy. Nursultan Nazarbaev ózara is-qımyldyń qazirgi ahýaly men ekijaqty qarym-qatynastardyń odan ári damý jaıyn talqylaý úshin bul kezdesýdiń mańyzdylyǵyn atap ótti. – Alda alýan túrli oqıǵalar tur, sonyń eń bastysy – Uly Otan soǵysyndaǵy Jeńistiń 70 jyldyǵy. Sonymen qatar, bizdiń elimiz TMD-ǵa tóraǵalyq etedi, soǵan baılanysty Astanada Dostastyq memleketteri basshylarynyń kezdesýi ótetin bolady. Budan bólek, Qazaqstan men Reseıdiń óńiraralyq yntymaqtastyǵy forýmyn ótkizý josparlanǵan. Jalpy, ekijaqty is-qımyldyń kóptegen máseleleri tıisinshe sheshilýde, – dedi Qazaqstan memleketiniń basshysy. Qazaqstan Prezıdenti úsh memleket basshysynyń kezdesýi óńirde jáne álemde bolyp jatqan oqıǵalar jóninde pikir almasýǵa, sondaı-aq, jahandyq ekonomıkadaǵy daǵdarys kórinisterine qarsy turý sharalaryn pysyqtaýǵa múmkindik beretinin aıtyp ótti. Vladımır Pýtın úshjaqty kezdesý ótkizý týraly bastamasy úshin Nursultan Nazarbaevqa alǵysyn bildirdi. – Biz úshin jaqyn seriktes jáne odaqtastyń biri bolyp sanalatyn Qazaqstanǵa árdaıym zor yqylaspen kelemin. Álemdik ekonomıkadaǵy ahýal ońaı bolyp turǵan joq. Qazaqstanda jáne búkil postkeńestik keńistikte, sonyń ishinde, Sizdiń tikeleı qatysýyńyzben qurylyp jatqan ekonomıka men áleýmettik sala jumysynyń negizderi qıyndyqtardy eńserýge septigin tıgizedi dep senemin. Árıne, biz muny budan burynǵy jyldardaǵydaı  birlesip atqarsaq, búgingi qalyptasqan qıyn jaǵdaıdan ońaı shyǵa alamyz, – dedi Reseı Prezıdenti. Kezdesý barysynda Qazaqstan men Re­seı­diń arasyndaǵy saýda-ekonomıkalyq qaty­nas­tardyń birqatar máseleleri talqylandy. Sondaı-aq, álemdik ekonomıkalyq  daǵdarys týdyrǵan qıyndyqtardy eńserý máseleleri týraly da sóz boldy. Bizge belgili bolǵanyndaı, Qazaqstan men Reseıdiń syrtqy eksportynyń ózegin quraıtyn munaı men gaz baǵalarynyń álemdik rynokta quldyraýy elder ekonomıkasyna keri áserin tıgizýde. Osynyń yqpalynda eki eldiń arasyndaǵy ózara saýda kóleminiń tómendegendigi baıqalady.  Jalpy, bul qubylys barlyq elder arasyndaǵy ekonomıkalyq qatynastarǵa tán problema bolyp otyr. Kezdesý barysynda qazirgi kezeńniń osyndaı kúrdeli de tosyn problemalaryn birlese otyryp eńserý máseleleri  basty áńgime arqaýyna aınaldy. Suńǵat ÁLIPBAI, «Egemen Qazaqstan».