«Qazaq gazetteri» seriktistiginiń shańyraǵynda Maqsut Narikbayev University stýdentteri qonaq boldy. Halyqaralyq jýrnalıstıka mektebinde bilim alýshylar «Egemen Qazaqstan» gazetiniń redaksııasymen tanysyp, tájirıbeli mamandardyń dárisin tyńdady.
Kezdesý aldymen redaksııanyń májilis zalynan bastaldy. Munda stýdentterdi bas dırektor Dıhan Qamzabekuly bastaǵan shyǵarmashylyq ujym qarsy aldy. Seriktestik basshysy jýrnalıstıkanyń qoǵamdyq róli taqyrybynda sóz sóılep, onyń aldaǵy bolashaǵynyń baǵdaryn túsindirdi. Onyń aıtýynsha, basylym betinde jaryq kóretin árbir árip pen ár sózdiń artynda úlken jaýapkershilik bar, sol sebepti gazet jýrnalıstıkasy saýattylyqty, mádenıettilikti jáne uqyptylyqty úıretedi.
Sonymen qatar dırektor orynbasary Qambar Ahmet stýdentterge jýrnalıstik etıka haqynda tolymdy maǵulamat berdi. Aqparatty shyndyq súzgizinen ótkizý, saraptaý, jarııalaý úderisteriniń satylaryn baıanadady.
Sóz barysynda bas redaktordyń orynbasary Talǵat Batyrhan da stýdentterge óziniń tájirıbesinen mańyzdy keńester berdi.
«Jýrnalıstıka – úıretetin emes, úırenetin óner». Shyǵarmashylyq jumys bolǵannan keıin tilshiden kúndelikti izdenis talap etiledi. Tilshi kez-kelgen sátte, kez-kelgen jaǵdaıda jazýǵa daıyn bolýy tıis. Bul úshin praktıkalyq eńebektiń mańyzy zor», dedi T. Batyrhan.
Odan bólek, basqa da bas redaktor orynbasarlary stýdentterge kásibı mashyqtaryn arttyratyn keńesterin aıtty.
Kezdesýden soń, stýdentter redaksııanyń túrli bólimderine ekskýrsııa jasady. Olar saıasat jáne quqyq, bilim jáne ǵylym, mádenıet jáne ádebıet, áleýmet jáne sport bólimderiniń tilshilerimen júzdesip, qyzmet barysyn baıqady.
Sonymen qatar Internet-radaksııa bólimine kelip saıt júıesimen, onyń jumys tártibimen tanysty.
Odan shyǵa bere, stýdentter gazet betiniń ázirlený, tekserilý kezeńin baqylap, kásibı redaksııalaý jumysynyń qyr-syryn uǵyndy.
Jıyn sońynda gazettiń aǵa tilshisi Beken Qaıratuly bolashaq tilshilerge aq sapar tilep, estelik syılyqtaryn tartý etti.
Araılym MAISATAI,Maqsut Narikbayev University stýdenti