Shyny kerek, bylaıǵy jurt «tórtinshi bılik» ataǵan jýrnalıstıkanyń róli qandaı degen saýal aldymyzdan jıi shyǵady. Sıfrlandyrý, álemdik aýqym, jedeldik, aýdıtorııamen baılanys sııaqty qurylymdar da jańaryp barady. Endigi jerde jýrnalıster tek kontent jasaýshy ǵana emes, medıamenedjer, analıtık, faktcheker retinde de óz mindetin atqarýy qajet ekeni kún tártibine enip barady.
Osy mamandyqtyń qyry men syryn bilgisi kelgen jas býyn kóbine gazet-jýrnal redaksııasyna arnaıy kelip, ondaǵy qaınap jatqan kásibı ómirdi kózimen kórýge yntyǵady. Bul – baıaǵydan kele jatqan kásiptik daǵdynyń biri. Keshe Maqsut Nárikbaev ýnıversıtetiniń Halyqaralyq jýrnalıstıka mamandyǵynda oqıtyn bir top bolashaq jýrnalıst bas basylym «Egemen Qazaqstan» gazeti redaksııasyna atbasyn burdy. Buıymtaılaryn surasaq, atalǵan gazettiń jumys barysymen tanysyp, materıal daıyndaý deıtin jaýapty istiń ereksheligin túsiný eken.
Gazet qyzmetkerleri úshin eń tapshy dúnıeniń biri – ýaqyt. Sonda da talaptanyp kelgen jastarǵa jón silteıik degen oımen saqa jýrnalsıter óz tájirıbelerimen bólisti. «Qazaq gazetteri» seriktestiginiń bas dırektory Dıhan Qamzabekuly qazir jýrnalıstıkanyń bedeli arta túskenin aıta kele, sonymen birge bul salaǵa jaýapkershiliktiń aýadaı qajettigin alǵa tartty. «Gazettiń ishki ómirin bilmeı, jýrnalıst bolý múmkin emes. Onyń ústine bul salada qarym-qatynas ta mańyzdy. Gazet jýrnalıstıkasy adamdardy saýattylyqqa úıretedi. Sol úshin osy mamandyqtyń qazanynda qaınaǵysy kelgen adam eń aldymen saýatty bolý kerek. Bir aıta ketetin jaıt – gazettiń qoǵamdaǵy róli týraly bolmaq. Shyndyǵynda, gazet – tarıh. Osy kásiptiń jumysyn atqaryp júrgender – tarıh jasaýshylar» degendi qosty.
Al bas dırektordyń orynbasary Qambar Ahmet jas jýrnalısterge aqparat daıyndaý, onyń durys-burystyǵyn qalaı tekserý jáne aǵymdaǵy aqparlardy der kezinde gazetke qalaı ázirleý kerektigi jóninde tájirıbesimen bólisti. «Egemen Qazaqstan» gazeti bas redaktorynyń orynbasary Talǵat Batyrhan jýrnalsıtıkanyń jumysyna shydaǵan adam ǵana osy salada nátıje shyǵaratynyn aıtyp, bolashaq jýrnalısterge sát-sapar tiledi.