Memleket basshysy Digital Bridge 2025 halyqaralyq forýmynda sóz sóıledi, dep habarlaıdy Egemen.kz Aqordanyń baspasóz qyzmetine silteme jasap.
«Digital Bridge 2025 halyqaralyq forýmyna qosh keldińizder! Eń aldymen, osy mańyzdy jıynǵa qatysý úshin arnaıy kelgen meımandarǵa shynaıy rızashylyǵymdy bildiremin», dedi Qasym-Jomart Toqaev
Memleket basshysy alqaly jıynǵa Majarstannyń Prezıdenti Joǵary Mártebeli Tamash Shýıoktiń qatysyp jatqanyn erekshe atap ótti.
«Qurmetti Prezıdent myrza, elimizge resmı saparmen kelip, forýmǵa qatysyp otyrǵanyńyzdy joǵary baǵalaımyn. Sizdiń ıdeıalaryńyz jáne bastamalaryńyz sıfrlyq tehnologııa salasyndaǵy halyqaralyq seriktestikti nyǵaıta túsýge septigin tıgizedi dep senemin.
Búginde «Digital Bridge» óte mańyzdy pikir almasý alańyna aınaldy, bul jerde jahandyq ózgerister men sıfrlyq ekonomıkanyń bolashaǵy týraly ózekti oılar aıtylyp, mańyzdy bastamalar kóteriledi. Osy ýaqyt ishinde forým jumysyna 67 myńnan astam adam, 500-den asa IT-kompanııa jáne 100 eldiń ókili qatysty. Qazaqstan Eýrazııadaǵy negizgi sıfrlyq hab retinde aldaǵy ýaqytta da osy mańyzdy jumysty jalǵastyra beredi», dedi Memleket basshysy.