Memleket basshysy jańa tehnologııany adamzat ıgiligine paıdalanýdy, ony progress pen yntymaqtastyqtyń qozǵaýshy kúshine aınaldyrýdy basty mindet retinde atady, dep jazady Egemen.kz Aqordanyń baspasóz qyzmetine silteme jasap.
«Qazir jahan jurtshylyǵy jasandy ıntellekt dáýirine qadam basty. Ozyq tehnologııanyń joǵary qarqynmen damýy saıasatqa, ekonomıkaǵa jáne mıllıardtaǵan adamnyń ómirine tikeleı áser etip jatyr. Buǵan bárimiz kýá bolyp otyrmyz», dedi Memleket basshysy.
Sarapshylardyń baǵalaýynsha, jasandy ıntellektiniń damýyna sońǵy jyldary dúnıe júzi boıynsha bir trıllıon dollardan artyq ınvestısııa salynǵan. Al atalǵan salanyń álemdik ekonomıkaǵa qosatyn úlesi taıaý onjyldyqta jeti trıllıon dollarǵa deıin jetýi múmkin. Áıtse de mundaı oń nátıjege atalǵan tehnologııany jaýapkershilikpen paıdalanǵan kezde qol jetkizýge bolady.
«Qazirgi tańda jasandy ıntellekt salasyndaǵy jaýapkershilik týraly qyzý pikirtalas júrip jatyr. Ásirese, ortaq retteý erejelerin túzý jáne barlyq eldiń ozyq tehnologııa men resýrstarǵa teń qoljetimdiligin qamtamasyz etý máselelerine aıryqsha nazar aýdarylyp otyr.
Bizdiń mindetimiz – jańa tehnologııany adamzat ıgiligine paıdalaný, ony progress pen yntymaqtastyqtyń qozǵaýshy kúshine aınaldyrý», dedi Prezıdent.