Aqmola oblysy basty astyqty óńir ekenin taǵy aıǵaqtady. Qazirdiń ózinde 6 mln tonnadan astam astyq bastyrylǵan, al jalpy ónim kólemi 7 mln tonnadan asady dep boljanyp otyr. Mundaı joǵary kórsetkishke óńir sońǵy 13 jylda jetpegen eken, dep jazady Egemen.kz.
Naýqannyń 80%-dan astamy aıaqtalyp, 156 sharýashylyq jumysty tolyqtaı aıaqtaǵan. Ortasha ónimdilik gektaryna 15,9 sentnerdi qurap, astyqtyń eleýli bóligi joǵary sapamen erekshelenedi.
Atalǵan nátıjege qolaıly tabıǵı jaǵdaılarmen qatar, agrarlyq sala ókilderine maýsymdyq naýqanǵa aldyn ala daıyndalýǵa múmkindik bergen keshendi memlekettik qoldaý da yqpal etkenin aıta ketken jón.
Aýyl sharýashylyǵy mınıstrliginiń baspasóz qyzmetiniń málimdeýinshe bıyl egistik alqaby 300 myń gektarǵa ulǵaıyp, 5,5 mln gektarǵa jetken. «Keń Dala-2» baǵdarlamasy boıynsha myńǵa jýyq fermer qarjylandyrýǵa ıe bolyp, mashına-traktor parkin jańartýǵa jáne sharýashylyqtardyń tehnıkalyq áleýetin nyǵaıtýǵa múmkindik aldy. Dala jumystaryna 20 myńǵa jýyq tehnıka jumyldyrylyp, jeńildikpen dızel otyny berildi.
Sońǵy eki jylda maıly daqyldar alqaby 2,5 esege ósip, alǵash ret 500 myń gektarǵa jetken. Sondaı-aq joǵary reprodýksııaly tuqymdar sebiletin aýmaqtyń úlesi artyp keledi.
Bul – aldaǵy jyldardaǵy jańa rekordtyq nátıjelerdiń negizin qalaıdy. Oblystyq aýyl sharýashylyǵy jáne jer qatynastary basqarmasynyń málimetinshe, bıylǵy ónim sońǵy jyldardaǵy eń joǵary kórsetkish. 7,2 mln tonna astyq pen 650 myń tonnadan astam maıly daqyl jınalady dep josparlanyp otyr.