Qara temirdi balqytyp, bir-birine jalǵaıtyn mamandyq ıesi Jandos Aıtalıev Qaratóbe aýdanynyń Aqqozy aýylynda dúnıege kelgen. Orta mektepti bitirgen soń Oral qalasyndaǵy qurylys tehnıkýmynda oqydy. Toqsanynshy jyldardyń sońyndaǵy toqyraý kezinde túrli salada qyzmet etti. Biraz ýaqyt munaı aınalasyndaǵy «Saipem» kompanııasynda nápaqa tapty.
«Dánekerleýshi degen mamandyqtyń mańyzy zor ekenin eń alǵash sol jerde kórdim», deıdi Jandos. Oǵan deıin de elektrmen pisiretin apparatty alyp, turmysqa, tirshilikke qajet jumysyn ózi tyndyra beretin aýyl balasy sheteldik kompanııadaǵy talapty áriptesteriniń sheberligin kórip, tańdaı qaǵypty. Aıtary joq, kásibin sheber meńgergen naǵyz mamannyń ár qımyly áserli bolady eken, elektrodty alyp turyp, tasqarańǵy áınektiń artynan ár shoqyǵany shedevr bolyp túskende tańǵalmasqa shara joq.
Jandos dánekerleýshi mamandyǵynyń naǵyz jaýapty jumys ekenin, maıtalman mamannyń mashyǵy yqylasty yjdaǵatpen, talaı jylǵy tájirıbemen keletinin túısindi. Sóıtip, «Energetık» oqý ortalyǵyna jazylyp, bul kásiptiń teorııasyna boılady. Kýrsty támamdaǵan soń KCG kompanııasyna jumysqa turdy. Bul jerde de Jandosqa taǵylymdy ustaz, tájirıbeli tálimger kezdesti.
«Osy ónerdi úıretken Muratbek Muhamberdıev pen Ernııaz Údireevterdi eshqashan umytpaımyn. Olardan dánekerleý tehnıkasyn, ádis-tásilin ǵana emes, mamandyqqa degen mahabbatty, jaýapkershilikti de úırendim», deıdi Jandos.
Adam bir kásipti tereń meńgergen saıyn aınalasyna qajet mamanǵa aınalady. Áýeli aınalasyna esik-tereze, qaqpa jasap, tájirıbe jınaǵan Jandos 2015 jyly «Yasin stroy kz» degen óz fırmasyn tirkedi. Iаsın – tuńǵysh ulynyń esimi. Bastapqyda kez kelgen tapsyrysty qabyldady. О́ıtkeni óz atyńdy dáleldeý, moıyndatý, halyq senimine ıe bolý ońaı emes. Birte-birte úlken jobalarǵa qol sozdy. Qurylysta sendvıch-panel dep atalatyn tehnologııa salasyn meńgerdi. Basynda Batys Qazaqstan oblysy aýmaǵynda júrse, keıin kórshiles Aqtóbe, Atyraý oblystarynan da tapsyrys túse bastady. Mine, búginde úsh qabatty saýda úılerin, kúrdeli ǵımarattardy qınalmaı turǵyza beretin qabyrǵaly mekemege aınaldy.
«Is tetigin maman sheshedi» degen. Biraq árbir máteldiń mánin óz basyńnan ótkergende anyq túısinedi ekensiń. Qazir janymda synnan ótken 6-7 azamat bar. Biz birge úırendik, birge óstik. Búginde kez kelgen tapsyrys alyp, kez kelgen kúrdeli ǵımaratty turǵyza alatynyma senemin. О́ıtkeni ujymymyz judyryqtaı jumylǵan, besaspap mamandar», deıdi Jandos.
Batys Qazaqstan oblysy