Qazaqstanda turǵyn úı qurylysy men ınfraqurylymdyq jobalardyń kólemi ósip keledi. Bul týraly Úkimet otyrysynda Ulttyq ekonomıka vıse-mınıstri Azamat Ámrın málimdedi. Onyń aıtýynsha, 2025 jyldyń 9 aıynyń qorytyndysy boıynsha qurylys salasy 14,9%-ǵa ulǵaıǵan, dep habarlaıdy Egemen.kz.
Azamat Ámrınniń sózinshe, ósim elimizdiń barlyq óńirlerinde derlik baıqalǵan. Eń joǵary kórsetkishter Astana qalasynda – 41,8%, Almatyda – 37,7%, Soltústik Qazaqstan oblysynda – 27,3%, Aqmola oblysynda – 26,4%, al Túrkistan oblysynda – 25,5% deńgeıinde tirkeldi.
Vıse-mınıstr sondaı-aq bıyl 12,9 mıllıon sharshy metr turǵyn úı paıdalanýǵa berilgenin habarlady. Bul ótken jyldyń osy kezeńimen salystyrǵanda 3,4%-ǵa artyq.
Mınıstrlik derekteri boıynsha, turǵyn úı qurylysy qarqyny joǵarylaǵan óńirlerdiń qatarynda Ulytaý oblysy (ósim 24,6%), Almaty oblysy (16%), Túrkistan oblysy (8,4%) jáne Jetisý oblysy (9%) bar. Sondaı-aq Almaty qalasynda da qurylys kólemi aıtarlyqtaı artqan – 18,2%-ǵa ósken.