Taıaýda elordada Azamattyq forým ótti. Ilkimdi is-shara aıasynda Ǵylym jáne joǵary bilim mınıstrligi, CCI Kazakhstan kompanııasy men ««Jasyl ekonomıkany» qoldaý jáne G-Global-dy damytý» Koalısııasy» ZTB arasynda «ReStart» birlesken jobasyn iske asyrý jónindegi josparǵa qol qoıý rásimi ótti, dep habarlaıdy Egemen.kz.
Jospar Memleket basshysy Qasym-Jomart Toqaevtyń halyqqa Joldaýynda kórsetilgendeı aýqymdy ekologııalyq apat qaýpine alań kóńilmen qarap, stýdent jastarda ekologııalyq mádenıetti qalyptastyrý men aınalmaly ekonomıkany damytýǵa tartý baǵytynda, sondaı-aq «Bilim týraly» Zańǵa sáıkes ázirlendi. Qol qoıylǵan jospardyń maqsaty – ekologııa, turaqty damý men ekologııalyq bilim berý salasyndaǵy bastamalardy iske asyrýǵa memlekettiń, azamattyq qoǵamnyń jáne bıznestiń ózara is-qımylynyń naqty platformasyn qurý.
Joba ekologııalyq mádenıetti damytýǵa, turaqty damý qaǵıdattaryn ilgeriletýge ári «jasyl ekonomıka» negizderin eldiń joǵary bilim berý júıesine engizýge baǵyttalǵan. Jospardyń negizgi mindetteriniń qatarynda ekologııalyq bilim berý men tárbıe salasyndaǵy Jastar bastamalaryn damytýǵa járdemdesý, JOO bazasynda stýdenttik eko-klýbtar men ǵylymı qaýymdastyqtardy damytý, ár qaldyqty bólek jınaý men «jasyl kampýstardy» damytý jónindegi jobalardy iske asyrý, sondaı-aq «jasyl» jobalardy ilgeriletý jáne seriktester men ınvestorlardy tartý bar.
Jospar CCI Kazakhstan kompanııasynyń on jyldyq tájirıbesi men tabysty «3.2.1. Start!» jobasynyń jetistikterine negizdelgen, jáne de ol joba bıylǵy jyly «ReStart» dep atalatyn jańa formatqa kóship, turaqty damý men eko-aǵartýǵa nazar aýdara otyryp, plastıkti bólek jınaý ári qaıta óńdeý mádenıetin damytýdyń eń iri ekoplatformasyna aınaldy. Tek qana 2024 jyldyń ózinde joǵary oqý oryndarynyń stýdentteri – QazMAÝ, QBTÝ, Satbayev University, QazUAZÝ, M.Qozybaev atyndaǵy SQÝ jáne basqalar -17 tonnadan astam plastıkalyq qaldyqtardy jınap, olardy jańa buıymdarǵa aınaldyrǵan.
Bıyl jobanyń toǵyzynshy maýsymynda stýdentterdiń jalpy sany 100 myńnan asatyn 14 JOO qatysty. Bir jyl ishinde stýdentter 35 tonnadan astam plastık jınady, bul ótken maýsymnyń kórsetkishterinen asyp tústi jáne joba búkil el boıynsha 15 senbilik ótkizdi. CCI Kazakhstan kompanııasynyń korporatıvtik jáne retteýshi qatynastar jónindegi dırektory Álıma Isembaeva josparǵa qol qoıý rásiminde sóz sóıledi.
«Bıyl joba óziniń onjyldyǵyn atap ótýde, ol damýdyń jańa kezeńimen – «ReStart» jańartylǵan ataýymen jáne aýqymdy mıssııasymen, stýdentterdiń kúndelikti ómirine qaldyqtardy júıeli túrde bólek jınaýdy ári ornyqty damý qaǵıdatyn engize otyryp, eldiń odan da kóp ýnıversıtetterin qamtý syndy máselemen saı kelip otyr. Ǵylym jáne joǵary bilim mınıstrligimen birlesip jumys isteý-azamattyq qoǵamnyń, memlekettiń jáne bıznestiń tıimdi seriktestigi naqty nátıjege qalaı qol jetkizetinin ári ekologııalyq jaýapty urpaqty qalyptastyra alatynyn kórsetetin mańyzdy qadam», dedi ol.
Jobany iske asyrý jyldarynda ondaǵan stýdenttik eko-klýbtar quryldy, qaldyqtardy bólek jınaý men qaıta óńdeý boıynsha kóptegen bastamalar ázirlendi, olardyń kópshiligi ýnıversıtetterdiń turaqty tájirıbesine aınaldy. Atap aıtqanda, Satbayev University-de plastıkalyq qaqpaqtardy jınaý jáne olardy shaǵyn sáýlet nysandarynyń elementterine qaıta óńdeý júıesi engizildi, QazUAZÝ-da «Jasyl kampýs» jobasy iske asyryldy, al M.Qozybaev atyndaǵy SQÝ-da stýdentter qaıta óńdelgen plastıkten jasalǵan kádesyı jelisin damytýda.
«ReStart» – tyń jarqyn túlekteriniń qataryna Rocket Plastic, Recycle Birge jáne EcoCashback – turaqty ınfraqurylymdar men damýdy jalǵastyratyn áleýmettik kásiporyndarǵa aınalǵan startaptar kiredi. «ReStart» bastamasy – turaqty damýdyń jańa kezeńi ári Qazaqstannyń 2030 – kún tártibin iske asyrýǵa qosqan úlesi bolmaq. «Biz memlekettiń, bıznestiń jáne azamattyq qoǵamnyń kúsh-jigerin biriktirý Qazaqstannyń BUU-nyń Turaqty damý maqsattaryna qol jetkizýi úshin berik negiz quratynyna senimdimiz», dedi Koalısııanyń Basqarma tóraǵasy Álııa Rahymbekova.
«Jasyl ekonomıkany» qoldaý jáne G-Global-dy damytý» Koalısııasy» ZTB qurylǵan sátten bastap elimizde turaqty damý men klımattyq aǵartý ıdeıalaryn ilgeriletýdiń saraptamalyq, ádistemelik jáne qoǵamdyq ortalyǵy sanalady. Qujatqa Ǵylym jáne joǵary bilim mınıstrligi tarapynan vedomstvonyń Apparat basshysy Madııar Qojahmet qol qoıyp, ıgi shara ekologııalyq bilim berý men jastar tárbıesin damytýdaǵy mańyzdy qadam ekenin aıtty.
«ReStart» jobasy-jastardyń ekologııalyq oılaýy men tabıǵatqa uqypty qaraý mádenıetin birlesip qalyptastyrýdyń jarqyn mysaly. Jospardy iske asyrý aıtarlyqtaı nátıje beretinine ári elimizdiń turaqty bolashaǵyn damytýǵa úles qosatynyna senemin», dedi Madııar Qojahmet.