Elordada «Polıarızasııadan seriktestikke: halyqaralyq júıege senimdi qalpyna keltirý» taqyrybynda Astana Think Tank Forum 2025 forýmy ótti. Is-sharany QR Prezıdenti janyndaǵy Qazaqstannyń strategııalyq zertteýler ınstıtýty (QSZI) Astana halyqaralyq forýmy (AIF) aıasynda uıymdastyrdy, dep jazady Egemen.kz.
QR Prezıdenti keńesshisi Maǵzum Myrzaǵalıev Memleket basshysy Qasym-Jomart Toqaevtyń kózqarasyna súıenip, Qazaqstan beıbitshilik, senim jáne jaýapty dıplomatııa qaǵıdattaryn árdaıym berik ustanatynyn atap ótti.
QR Syrtqy ister mınıstriniń birinshi orynbasary Erjan Ashyqbaev qazirgi kezeńde «konstrýktıvti konsensýsti» qalyptastyrý men kópjaqtylyqty nyǵaıtý mańyzynyń artqanyn, sebebi turaqty jáne ádil álemdik tártipti saqtaý jaýapkershiligi bir tarapqa ǵana emes, aýqymdy memleketterdiń barlyǵyna júkteletinin aıtty.
Forýmnyń basty is-sharalarynyń biri «О́zgermeli jahandyq qaýipsizdik arhıtektýrasyndaǵy Ortalyq Azııa» taqyrybyndaǵy III Ortalyq Azııa qaýipsizdik jáne yntymaqtastyq forýmy boldy.
Forým barysynda Ortalyq Azııanyń jetekshi saraptamalyq ortalyqtarynyń basshylary halyqaralyq qaýipsizdik júıesiniń transformasııasy óńirlik turaqtylyq pen damý úshin týyndatatyn syn-qaterlerdi taldap, aımaqtyq yntymaqtastyqtyń bolashaǵyn jáne ósip kele jatqan polıarızasııa jaǵdaıynda jahandyq dıalogqa kópir bolatyn Ortalyq Azııanyń rólin talqylady.
Sondaı-aq sarapshylar jetekshi derjavalardyń básekelestigi turǵysynda kópjaqty yntymaqtastyqtyń keleshegi, qaýipsizdik arhıtektýrasynyń ózgerýi jáne ıadrolyq qarýsyzdaný men taratpaý bolashaǵy, Aýǵanstan faktorynyń óńirge áseri, jahandyq naryqtardyń bytyrańqy jaǵdaıyndaǵy ınvestısııalar, Eýrazııadaǵy saýda-kólik dálizderin damytý, jasandy ıntellekt pen onyń etıkalyq máseleleri, sondaı-aq klımattyń ózgerýi men sý tapshylyǵynyń demografııalyq jáne kóshi-qon prosesterine yqpaly sııaqty taqyryptardy talqylady.
Forýmnyń eki kúndik jumysy qorytyndysynda QR Prezıdenti janyndaǵy QSZI dırektory Jandos Shaımardanov Astana Think Tank Forum 2025 alańynyń senimge, ashyq pikirtalasqa jáne praktıkalyq sheshimder izdeýge negizdelgen halyqaralyq saraptamalyq platforma retindegi tıimdiligin atap ótti.
Is-sharanyń seriktesteri: Eurasian Resources Group (ERG) tabıǵı resýrstardy óndirý jáne óńdeý salasyndaǵy álemdik jetekshi kompanııasy, Qazaqstandaǵy iri taý-metallýrgııa kompanııasy – «Qazaqmys», sondaı-aq otandyq aýyl sharýashylyǵy tehnıkasyn jasaý salasynyń kóshbasshysy – AGROMASH zaýyty.