Memleket basshysy halyqqa Joldaýynda: «Jasandy ıntellektini qoldanyp, aýyl sharýashylyǵy jerlerine spýtnıkpen monıtorıng jasaýdyń tıimdiligin arttyrý kerek. Sonyń negizinde jerdiń sapasyna, eginniń shyǵymyna, dándi daqyldardyń jaı-kúıine, qaı jerge qandaı daqyl egilgenine tereń taldaý jasalýǵa tıis. Bul – orman sharýashylyǵyna da qatysty másele. Jaqynda Soltústik Qazaqstan oblysynda 9 myń gektar ormannyń ıesiz jatqany anyqtaldy», dep atap ótti.
Soltústik Qazaqstan oblystyq tabıǵatty qorǵaý prokýratýrasy keıingi eki jyldyń kóleminde esepke alynbaǵan, qorǵaýsyz qalǵan myńdaǵan gektar orman alqaptaryn anyqtaǵan. Prezıdenttiń Joldaýynda aıtylǵan alqaptar osy tekseristerdiń nátıjesinde anyqtalǵan.
«Orman kodeksiniń 51-1 babyna sáıkes, ózge sanattaǵy jerlerde tabıǵı ósken ekpeler memlekettik orman qory quramyna enedi. Atalǵan normaǵa qaramastan, Soltústik Qazaqstan oblysy ákimdiginiń tabıǵı resýrstar basqarmasynyń laýazymdy tulǵalary jerdi aýdarý, esepke alynbaǵan orman alqaptaryna túgendeý júrgizý máselesin aýdan ákimderimen úılestirýdi júzege asyrmaǵan», dep jazylǵan prokýratýranyń esebinde.
Prokýrordyń talabymen júrgizilgen túgendeý nátıjesinde Aıyrtaý, Esil, Jambyl, Qyzyljar, Mamlıýt, Tımırıazev aýdandarynda memlekettik orman qorynan tys qorǵaýsyz qalǵan osy 9 myń gektardan astam ormandy jerler anyqtalǵan. Soltústik Qazaqstan oblystyq tabıǵı resýrstar jáne tabıǵat paıdalanýdy retteý basqarmasynan alynǵan málimetke qaraǵanda, óńir aýmaǵyndaǵy orman qorynyń jalpy aýdany 688 myń gektardy quraıdy. Onyń ishinde «Kókshetaý» memlekettik ulttyq tabıǵı parkine qaraıtyny 134,5 myń ga, qalǵan 553,5 gektary jergilikti atqarýshy organdar aýmaqtarynda. Oblystyq tabıǵı resýrstardy baqylaý basqarmasyna 12 orman sharýashylyǵy, «Janýarlar dúnıesin qorǵaý jónindegi jedel qyzmet» KMK men «Qyzyljar sý qoımalary» KMK mekemeleri qaraıdy. Basqarmanyń ózinde birneshe bólim bar. Osynsha baǵynysty sharýashylyqtary, ýchaskeleri, myńdaǵan qyzmetkeri bar basqarmanyń kúni búginge deıin 9 myń gektar ormandy alqapty nege ıesiz qaldyrǵany belgisiz.
Qazir tabıǵat qorǵaý prokýratýrasynyń qadaǵalaý aktisiniń negizinde ákimdikter barlyq múddeli organdardyń qatysýymen komıssııa quryp, anyqtalǵan ıesiz ýchaskelerdi memlekettik orman qory quramyna engizý jóninde naqty merzimder belgilep, jaýapty oryndaýshylardy taǵaıyndap, Jol kartasyn ázirledi. О́z mindetin tıisinshe oryndamaǵan tórt laýazymdy tulǵa tártiptik jaýapqa tartyldy.
Ekologııalyq jaǵdaıdy jaqsartý Memleket basshysy aıqyndaǵan memlekettik saıasattyń basym baǵytynyń biri ekenin eskere otyryp, memlekettik orman qoryn keńeıtý arqyly, jergilikti, ýákiletti organdardyń qyzmetin úılestirý maqsatynda is-sharalar ótkizildi. Máseleni qadaǵalaý prokýratýranyń turaqty baqylaýyna alyndy. Sonymen qatar prokýratýra memlekettiń materıaldyq múddelerin qorǵaý jóninde júıeli jumystar júrgizip, jyl basynan beri prokýrorlyq qadaǵalaý sharalary arqyly jalpy somasy 30 mlrd teńgeni quraıtyn múlikterdi memleket menshigine qaıtardy. Mysaly, Esil aýdanynda 14 nysan (sý munarasy, aýyldyq klýb ǵımaraty, transformatorlyq qosalqy stansa, uńǵyma, sý qubyrynyń taratý jelileri, t.b.) ıesiz bolyp kelgen.
Byltyr da orman sharýashylyǵynyń jaýapty adamdary prokýratýranyń qadaǵalaý sharalarynan keıin ákimshilik jaýapqa tartylyp, olardan 11 mln teńge kóleminde ormandardy molyqtyrý tólemi óndirilgen. Bıylǵy prokýratýra anyqtaǵan ıesiz qalǵan 9 myń ga orman alqabyn tabıǵat resýrstary basqarmasy naqtylaı kele 10 myń gektardan asyryp jiberdi. Endi sonyń 9 822 gektary uzaq merzimge 237 jer paıdalanýshylarǵa beriledi, 596 gektary memlekettik orman qoryna alynady.
Soltústik Qazaqstan oblysy