Qazirgi tańda Aqtaý qalasyndaǵy jylý jelileriniń 79 paıyzynyń tozyǵy jetip, tolyqqandy jóndeýdi qajet etedi. Injenerlik ınfraqurylymnyń tozý deńgeıiniń joǵary bolýy saldarynan jyl saıyn qalada shamamen 1500-ge jýyq apattyq jaǵdaı tirkelip otyr. Bul óz kezeginde turǵyndardy sýmen jáne jylýmen turaqty qamtamasyz etýge eleýli keri áserin tıgizip keledi, dep habarlaıdy Egemen.kz.
Atalǵan túıtkildi júıeli sheshý maqsatynda 2029 jylǵa deıin qala boıynsha 24 shaǵyn aýdanda 918 shaqyrymǵa jýyq ınjenerlik jelini jańǵyrtý josparlanǵan. Bul jumystar eń aldymen tozý deńgeıi asa joǵary tómengi aımaqtardan bastaý aldy. Bıyl 3a, 3b shaǵyn aýdandarynda jáne aýrýhana qalashyǵynda jylý jelilerin qaıta jańartý jumystary sátti aıaqtaldy. Nátıjesinde, apattyq jaǵdaılardyń sany edáýir qysqaryp, kommýnaldyq qyzmetterdiń sapasy aıtarlyqtaı artty.
Mańǵystaý oblysynyń ákimi N.Qılybaı sý jáne jylý júıelerindegi aqaýlardy joıý jumysyn basty nazarda ustap otyr. Osy oraıda oblys ákiminiń orynbasary, jylytý maýsymyna daıyndyq jáne ony ótkizý jónindegi oblystyq jedel shtabtyń basshysy Erbol Izbergenovtyń tóraǵalyǵymen Aqtaý qalasyndaǵy nysandardy aralaý arqyly júrmeli jıyn ótti. Jıynda 2025–2026 jyldardaǵy jylytý maýsymyndaǵy ózekti máseleler talqylanyp, qala aýmaǵyndaǵy jylý jelilerinde anyqtalǵan aqaýlardy joıý boıynsha atqarylyp jatqan sharalar qaraldy. Jaýapty mekemelerge oryn alǵan aqaýlardy jedel túrde joıý jóninde naqty tapsyrmalar júkteldi.
Bul baǵyttaǵy keshendi sharalar aldaǵy ýaqytta da óz jalǵasyn tabatyn bolady.