Premer-mınıstr Oljas Bektenov Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Joldaýynda belgilengen mindetter aıasynda otandyq IT-kompanııalardyń ókilderimen kezdesti. Kezdesýde bilim berý, sport jáne ónerkásip baǵyttaryndaǵy jasandy ıntellekt (JI) tehnologııalaryn damytý jáne qoldaý máseleleri talqylandy, dep habarlaıdy Egemen.kz.
Otandyq Paradigm Shift (CodiPlay) kompanııasynyń ókilderi ózderiniń jańa bastamalary týraly baıandady. Kompanııa ázirlegen AI Kitap jobasy – bul mektep pánderi boıynsha ár oqýshynyń deńgeıine qaraı oqý materıalyn laıyqtaýǵa arnalǵan, progreske taldaý jasaıtyn jáne bilimdegi olqylyqtardy anyqtaıtyn sıfrlyq oqýlyq. Qazir onyń jumys nusqasy daıyndalyp, AITU júıesimen ıntegrasııa júrgizilip jatyr.
Sonymen qatar, OlympIQ atty sport salasyna arnalǵan tehnologııalyq platforma tanystyryldy. Bul júıe sportshylar men uıymdardyń analıtıkalyq, medısınalyq jáne uıymdastyrýshylyq derekterin jasandy ıntellekt arqyly óńdeıdi. Qazir joba boıynsha jol kartasy ázirlenip, alǵashqy prototıpter daıyndalǵan.
Premer-mınıstrge bul eki jobany pılottyq rejımde engizý josparlanǵan mektepter men sport federasııalarynyń tizimi de usynyldy.
«Jasandy ıntellekt tehnologııalaryn damytý – Úkimettiń basty mindeti. Biz otandyq kompanııalardyń ónimderin jan-jaqty qoldaýǵa daıynbyz», dedi Oljas Bektenov.
Kezdesý barysynda sondaı-aq óndiristik prosesterdi ońtaılandyrýǵa, energetıka men kólik salalarynyń tıimdiligin arttyrýǵa baǵyttalǵan tehnologııalyq sheshimder de sóz boldy. Kompanııa ókilderi óndiristegi shyǵyndardy azaıtyp, táýekelderdi basqarýǵa múmkindik beretin ıntellektýaldy júıelerdiń ázirlenýi jaıynda baıandady.
Kezdesý qorytyndysynda Úkimet basshysy tıisti memlekettik organdarǵa IT-mamandardyń usynystaryn muqııat qarap, júzege asyrý boıynsha naqty sharalar qabyldaýdy tapsyrdy.