Belsendi uzaq ómir súrý ortalyǵynyń zeınetkerleri elordadaǵy 73 mekteptiń 8-10 synyp oqýshylarymen kezdesti. Is-shara – tarıh pániniń muǵalimi Gaýrı Jomartovanyń «Alash zańgerleri: táýelsizdik pen sabaqtastyq taqyrybyn zertteýde ınnovasııalyq ádisterdi qoldaný» atty avtorlyq baǵdarlamasy aıasynda mańyzdy kezdesýge aınaldy, dep jazady Egemen.kz.
Atalǵan ortalyqtyń «Ádemi» ansambliniń ónerpazy, mádenıet salasynyń ardageri, rejısser Erkin Qasenov «Ashyq mıkrofon» formatynda oqýshylarymen pikir almasty ári ultjandylyq mazmunynda óleńder oqyp, jastardyń rýhtanýyna úles qosty.
Al, álıhantanýshy, fılologııa ǵylymdarynyń kandıdaty, Alash ǵylymı-zertteý ınstıtýtynyń dırektory Sultan Han Aqqululy Júsip oqýshylarǵa Alash ıdeıasynyń mán-mańyzy men táýelsizdikke qosqan úlesi týraly baıandap, jastardyń suraqtaryna tushymdy jaýaptaryn berdi.
Kezdesý barysynda oqýshylarǵa Qazaqstannyń alǵashqy Konstıtýsııasyn jasaǵan zańgerlerdiń tarıhı róli jáne naqty eńbekteri týraly qyzyqty derekter usynyldy.
Qazaq ıntellıgensııasynyń tarıhyn nasıhattaýǵa baǵyttalǵan is-sharanyń basty maqsaty – jastardy Alash qaıratkerleriniń táýelsizdik jolyndaǵy eńbegimen, zań salasyndaǵy jetistikterimen tanystyrý, ultjandylyq rýhynda tárbıeleý edi.
«Kezdesýdiń tanymdyq áseri zor boldy. Aǵa býyn ókilderiniń úlgi isteri – biz úshin ónege. Qazirgi ýaqytta 10 synyp oqýshylary Alash qaıratkerleri týraly derekti fılm túsirý ıdeıasyn qolǵa alyp otyr, sol sebepti kesh óte paıdaly boldy, tyń maǵlumattar aldyq», dedi 10-synyp oqýshysy Estaı Ertaı.