Májilistiń depýtattary men apparat qyzmetkerleri marapattaldy

Alqaly jıynda Májilis spıkeri osydan 35 jyl buryn barsha qazaqstandyqtar úshin taǵ­dyrsheshti mánge ıe «Egemen­dik týraly» Deklarasııa qabyl­danǵanyn atap ótti. Sodan bergi ara­lyqta elimiz uzaq joldan ótti, barlyq salada zor jetis­tikke jetip, halyqaralyq arena­daǵy bedeldi mem­leketterdiń birine aınaldy.

– Prezıdent bastamasymen Res­pýblıka kúnine jańasha lep berilip, tarıhı mańyzy aıshyqtala tústi. Bul mereke Jańa Qazaqstannyń basty sımvolyna aınaldy. Búginde elimiz óz tarıhyndaǵy mańyz­dy kezeńdi ótkerýde. Biz aýqym­dy ózgeristerdiń kýágeri bolyp, oǵan belsene atsalysyp júrmiz. Barlyq saıası ınstıtýt jańardy, qoǵam men memleket arasyndaǵy syndarly dıalog nyǵaıa tústi. Ashyqtyq pen senimge negizdelgen osy ózgeristerdiń arqasynda oń nátıjelerge qol jetkizip otyrmyz,– dedi E.Qoshanov.

Spıker el ómirindegi ma­ńyz­­dy máselelerdi sheshýde halyq­tyń azamat­tyq jaýap­kershiligi men belsen­di­ligi artqanyn, «Kúshti Prezı­dent – yqpaldy Parlament – esep beretin Úkimet» formýlasy ornyqqanyn atap ótti. Kóppartııaly Parlament­tiń róli men bedeli kúshe­ıip, syndarly pikirtalas alańy­na aınalǵanyn, Memleket basshysynyń saıası baǵdaryn zańnamalyq turǵyda qoldaýǵa jan-jaqty atsalysyp júr­genin jetkizdi.

Jýyrda Prezıdent Jol­daýyn­da kóterilgen parla­ment­­tik reformaǵa toqtalǵan Erlan Qoshanov bul ózgerister­diń el bolashaǵyndaǵy róli zor ekenin, aldaǵy tarıhı ózgeris­ter­ge depýtattyq korpýs belsene atsalysýy kerektigin basa aıtty. Sondaı-aq keler jyly el Parlamentine 30 jyl tolatynyn, osy tarıhı kún memleket­tik deńgeıde atap ótiletinin jet­kiz­di. Májilis tóraǵasy aıtqan­daı, bul – ótkenimizdi saralap, búginimizdi baǵamdaıtyn jáne bolashaq mańyzdy belesterdi aıqyndaıtyn kezeń.

Májilis spıkeri Respýblıka kúnine oraı Aqordada ótken sal­tanat­ty jıynda Mem­leket bas­shysynyń qolynan «Parasat» ordenin alǵan Máji­lis­tiń Qarjy jáne bıýdjet komı­teti­niń tór­aıy­my Tatıana Saveleva­ny ma­ra­patymen quttyqtady.

Jıyn sońynda palata tór­aǵa­­sy birqatar depýtattar men Máji­lis apparatynyń qyz­met­ker­lerin memlekettik nagrada­larmen marapattady.

Depýtattar Gúldara Nurym, Amanjol Áltaı, Murat Ergesh­baev «Parasat» ordenimen marapattaldy. Qazybek Álishev, Vera Kım, Erlan Stambekov, Májilis apparaty bólim meń­gerýshisiniń orynbasary Marat Ádilbaı «Qurmet» orde­nin ıelendi. Májilis depýtattary Temir Qyryqbaev, Aıtýar Qoshmambetov, Naýryz Saılaýbaı, Islam Suńqar, eks-depýtat Erjan Beısenbaev, Májilis apparaty bólim meń­gerý­shileriniń orynbasarlary Qarlyǵa Jumataeva, Janat Qýanysh­baeva jáne Saltanat Stanbaeva «Eren eńbegi úshin» medalin ıelendi.

Depýtattar Snejanna Imasheva men Erlan Barly­baev – TMD Parla­mentaralyq Assambleıasynyń medali­men, Sergeı Ponomarev – «Drevo drýjby» medalimen marapat­taldy. Máj­i­lis depýtat­tary Erkin Ábil, Serik Egizbaev, Únzıla Shapaq, Májilis apparaty bóliminiń meńgerý­shisi Batyrbolat Qabosh TMD Parlamentaralyq Assambleıa­synyń qurmet gramota­laryn ıelendi. TMD Parlamentaralyq Assambleıasynyń Qurmet belgisi depýtat Aıan Zeınýllınge, UQShU Parlamenttik Assambleıasy­nyń medali – Májilis apparaty basshysynyń orynbasary Bolat Kalıanbekovke, UQShU Parlamenttik Assambleıasynyń qurmet gramotasy – depýtat Konstantın Avershınge jáne Máj­ilis apparaty bólimi meń­ger­ýshisiniń orynbasary Jantas Tasbolatovqa tabystaldy.

Sonymen qatar Májilis ap­paratynyń 16 qyzmet­keri, Materıaldyq-tehnıkalyq qam­tamasyz etý basqarmasy­nyń 6 qyzmetkeri Májilis tóraǵasynyń Alǵyshatyna ıe boldy.