Ulyq mereke respýblıka kúni Turar Rysqulov aýdanyna qarasty Qaıyńdy aýyldyq okrýgindegi Sógeti jáne Mamaı aýyldary taza aýyz sýǵa qol jetkizdi, dep habarlaıdy Egemen.kz.
Jalpy quny 1 mlrd teńgege jýyq qos joba memlekettik bıýdjet esebinen qarjylandyrylyp, qurylys jumystaryn «Temir Stroı Servıs ı Ko» jáne «Pyraq-Qurylys» jaýapkershiligi shekteýli seriktestikteri atqardy.
Saltanatty is-sharaǵa qatysqan aýdan ákimi Ernar Esirkepov bul jumystardyń Memleket basshysy Qasym-Jomart Kemeluly Toqaevtyń «Halyq únine qulaq asatyn memleket» tujyrymdamasy men 2025 jyldyń sońyna deıin eldi mekenderdi tolyq aýyzsýmen qamtý jónindegi tapsyrmasy aıasynda júzege asqanyn atap ótti.
Buǵan deıin turǵyndar tirshilik nárin kóshe basynan tasyp ishse, endi ár úıge deıin tartylǵan taza sýdyń ıgiligin kórýde. Aýyl aqsaqaldary men turǵyndar qýanyshtaryn jasyra almaı, jańa nysannyń iske qosylýyna atsalysqan azamattarǵa alǵys aıtyp, aq batalaryn berdi.
Aıta ketsek, sońǵy úsh jylda aýdan aýmaǵyndaǵy ondaǵan eldi meken ortalyqtandyrylǵan aýyz sýmen qamtylǵan. Al jyl sońyna deıin taǵy úsh nysan — Shóńger, Qulan jáne R. Sábdenov aýyldaryn taza sýmen qamtý josparlanǵan.
Eske sala ketsek, biraz ýaqyt buryn «Egemen Qazaqstan» gazetiniń tilshisi dál osy Sógeti men Mamaı aýyldarynyń aýyz sýdan taryqqanyn alǵa tartyp, «Qyzyl qurt aralasqan sý iship otyr» taqyrybymen maqala jazǵan bolatyn.
Jambyl oblysy
Turar Rysqulov aýdany.