Elorda Aqparat medıaholdınginiń uıymdastyrýymen Respýblıka kúnine, sondaı-aq «Astana aqshamy» jáne «Vechernıaıa Astana» gazetteriniń 35 jyldyq mereıtoıyna oraı jýrnalıster arasyndaǵy dástúrli bılıard týrnıri ótti, dep jazady Egemen.kz.
Bıyl tórtinshi ret uıymdastyrylǵan dodaǵa elordadaǵy qalamgerler, jýrnalıster, qoǵam qaıratkerleri men zııaly qaýym ókilderi qatysty.
Is-sharanyń ashylýynda Astana qalalyq qoǵamdyq keńesiniń tóraǵasy Zulfýhar Ǵaıypov sóz sóılep, egemendiktiń bastaýy sanalatyn Respýblıka kúni merekesiniń tarıhı máni men mańyzyna toqtalyp, jınalǵandardy Respýblıka kúnimen quttyqtady.
«Búgingi jetistigimizdiń bári – beıbit zamannyń, toqshylyq dáýirdiń, egemen el bolǵanymyzdyń arqasy. Bas qalamyzdyń tarıhyn ǵana emes, táýelsiz Qazaqstannyń árbir tarıhı kúniniń kýágeri qos basylymnyń mereıtoıy qutty bolsyn», - dedi ol.
Sondaı-aq QR Parlamenti Senatynyń depýtaty Altynbek Nuhuly qatysýshylardy merekemen jáne qos basylymnyń 35 jyldyq mereıtoıymen quttyqtap, Elorda Aqparat medıaholdıngi dırektory Oljas Sydyqbek pen «Astana aqshamy» gazetiniń bas redaktory Erkin Qydyrǵa shapan jaýyp, Akademık Qanysh Sátbaevtyń 5 tomdyq eńbegin syıǵa tartty.
Jarystyń ashylý saltanatynda qazaq ádebıetiniń kórnekti ókilderi, jazýshy Tólen Ábdik pen Qoıshyǵara Salǵara sóz sóılep, qatysýshylarǵa batasyn berip, sáttilik tiledi.
«Astana aqshamy» gazetiniń burynǵy redaktorlaryna jáne kelgen qonaqtarǵa sóz berilip, jyly estelikter men izgi tilekter aıtyldy.
Qalamgerler arasyndaǵy oıyn óte tartysty ótti. Tastaıaq sheberleriniń biri saqany kózdese, endi biri shardy dál upaı uıasyna baǵyttap, saıystyń kórigin qyzdyrdy.
Sóıtip, oıyn nátıjesinde úshinshi oryndy Talǵat Eshenuly men Sádibek Túgeluly, ekinshi oryndy Qaırat Saq, al birinshi oryndy Naýryzbek Sarsha jeńip aldy.
Budan bólek, «Alǵashqy soqqy», «Mádenıetti oıynshy», «Mergen oıynshy», «Sheber oıynshy» sekildi arnaıy atalymdar da tabystaldy.
Elorda Aqparat medıaholdınginiń dırektory Oljas Sydyqbek kórnekti jazýshy Tólen Ábdikke Mirjaqyp Dýlatov atyndaǵy, al Qoıshyǵara Salǵaraǵa Ilııas Esenberlın atyndaǵy arnaýly syılyqty tapsyrdy.