Beıneý aýdanyna qarasty Tájen aýylynda 25 qazan – respýblıka kúni qarsańynda jańa medısınalyq pýnkt ashyldy, dep habarlaıdy Egemen.kz Mańǵystaý oblystyq Qoǵamdyq kommýnıkasııa ortalyǵyna silteme jasap.
«Oblys ortalyǵynan shalǵaıda, shekara mańynda ornalasqan Tájen aýylynda medısınalyq pýnkttiń ashylýy – turǵyndar úshin qýanyshty jańalyq. Buǵan deıin medısınalyq qyzmet Aqjigit dárigerlik ambýlatorııasynyń quramynda kórsetilip kelgen bolsa, endi turǵyndar óz aýylynda zaman talabyna saı medısınalyq kómek ala alady. Bul nysan Memleket basshysynyń tapsyrmasyna sáıkes Qazaqstan Respýblıkasy Úkimetiniń 2022 jylǵy 30 qarashadaǵy №962 qaýlysy negizinde «Aýylda densaýlyq saqtaýdy jańǵyrtý» ulttyq pılottyq jobasy aıasynda salyndy. Árıne, medısına nysanynyń ashylǵany qýantady, biraq eń bastysy – shaqyrtýlar az, halyqtyń deni saý bolsyn», dedi Beıneý aýdanynyń ákimi Rahymjan Shalbaev.
Jańa medısınalyq pýnkt zamanǵa saı qurylǵylarmen jabdyqtalyp, turǵyndarǵa sapaly qyzmet kórsetýge barlyq jaǵdaı jasalǵan. Munda eki medısına qyzmetkeri eńbek etedi.
Mańǵystaý oblysy