Jer-jahannyń ár qıyrynan jınalǵan beldi balýandardyń basyn qosqan Horvatııa astanasy Zagrebtegi álem chempıonaty aıaqtalǵan soń Birikken kúres áleminiń (UWW) reıtıngi jańartyldy.
Grek-rım kúresinen 60 kg salmaqta bas júldeni oljalaǵan Aıdos Sultanǵalı osyǵan deıin 43-oryndy qanaǵat tutyp kelgen edi. Zagrebte tarıhı altynǵa qol jetkiz-gennen keıin birden 5-orynǵa kóterildi. Syr boıy sańlaǵynyń bul jetistigine barsha jankúıer qýandy. Buǵan deıin qazaq «klassıkteri» arasynan tórt-aq álem chempıony shyqty. Shámil Serikov 1978, 1979 jyldary Mehıko (Meksıka) men San-Dıegoda (AQSh) dara shyqsa, Jaqsylyq Úshkempirov 1981 jyly Osloda (Norvegııa) ozdy. 1989 jyly Martınıde (Shveısarııa) Dáýlet Turlyhanov teńdessiz dep tanyldy. 1998 jyly Evlede (Shvesııa) Baqtııar Baıseıitovtiń baq juldyzy jandy. Bul jeńisterdiń barlyǵy da ótken júzjyldyqtyń enshisinde. Endi mine, HHI ǵasyrda Aıdos Sultanǵalı sol belesti baǵyndyrdy. Ol qazaq grek-rım kúresi sheberleri tarıhyndaǵy osyndaı deńgeıge jetken besinshi balýan. Al «Bes saýsaq jumylsa, judyryqqa aınalatyny» belgili. Olaı bolsa, Jaqsylyq aǵamyz aıtqandaı, «qazaq jigitteri arasynan endi chempıondar kóptep shyǵady» dep úmittenemiz.
Reıtıngtegi jaǵdaılaryn jaqsartqandar arasynda Mereı Máýletqanov (72 kg) pen Islam Evloev ta (87 kg) bar. Kúni keshege deıin alǵashqysy 30, ekinshisi 16-orynda turdy. Horvatııada ekeýi de jeńis tuǵyryna synyq-súıem qalǵanda súrindi. Qola medal úshin tartysta joldary bolmady. Desek te, jas balýandarǵa besinshi orynnyń ózi jaqsy nátıje. Sonyń arqasynda ekeýi de 6-orynǵa kóterildi. Mereıdiń 22, Islamnyń 21 jasta ekenin eskersek, olardyń keleshekte talaı bıikten kórinetinine senim mol.
Kerisinshe, birneshe balýanymyz reıtıngtegi jaǵdaılaryn kúrt nasharlatyp aldy. Byltyr álem chempıonatynda kúmispen kúptelgen Erjet Jarylqasyn (63 kg) bıylǵy dodada qatty súrindi. Sonyń kesirinen 4-orynnan 18-satyǵa syrǵyp tústi. Parıj Olımpıadasynyń kúmis júldegeri Demeý Jadyraev (77 kg) bıylǵy jyldyń eń jaýapty jarysynda óz deńgeıinde kúrese almady. Buǵan deıin 6-satyda nyq turǵan saqa sportshy qazir 13-orynǵa tómendedi. Álimhan Syzdyqov (130 kg) – 10, Marlan Muqashev (55 kg) – 13, Álmır Tólebaev (82 kg) – 18, Dinmuhamet Qoshqar (67 kg) – 34-orynda. Zagrebtegi dodada tusaýkeser kezdesýinen keıin-aq kórermender qataryna qosylǵan Rahat Berjanov (97 kg) reıtıngte múlde joq.
Erkin kúres sheberleri álem chempıonatyn qos qola medalmen qorytyndylaǵany belgili. Biraq UWW óz reıtıngin jańartý barysynda ekeýiniń ónerin eki túrli baǵalaǵan eken. Máselen, 61 kg salmaqta úzdik úshtikti túıindegen Asyljan Esenkeldi 34-ten birden 4-orynǵa kóterildi. 70 kg salmaq dárejesinde dál sondaı kórsetkishke qol jetkizgen Nurqoja Qaıpanov kerisinshe, 3-ten 9-satyǵa syrǵydy.
Osyǵan deıin reıtıngke múldem enbegen Kámil Krýglıev (92 kg) jarysta júlde ala almaǵanymen, óte sapaly ári saýatty kúresip, kórermenderdiń kózaıymyna aınaldy. 20 jastaǵy jigitke jankúıerler dán rıza boldy. Qazirgi kezde Kámil 8-orynda tur. Qalǵan jerlesterimizdiń nátıjeleri mynadaı: Azamat Dáýletbekov (86 kg) – 16, Nachyn Kýýlar (65 kg) – 24, Rızabek Aıtmuhan (97 kg) – 25, Bolat Saqaev (79 kg) – 25, Álibek Ábdiqasymov (65 kg) – 34, Álisher Erǵalı (125 kg) – 37-oryn.
Áıelder kúresindegi jaǵdaıymyz kóńil kónshitpeıdi. Qart qurlyqqa sapar shekken toǵyz burymdynyń segizi birinshi aınalymnan asa almady. Ekinshi kezeńge bir ǵana sportshy shyqty. Onyń ózi sol mejede oısyraı utyldy. Elimizdiń eń úzdik balýany Jámıla Baqbergenova (72 kg) kúni keshege deıin álemdik reıtıngte kósh bastap turdy. Horvatııanyń astanasyndaǵy sátsizdikten keıin 6-satyǵa syrǵyp tústi. Taǵy bir maqtanyshymyz, Rıo Olımpıadasynyń qola júldegeri Elmıra Syzdyqova da (76 kg) sońǵy saıysta súreńsiz óner kórsetti. Bul kúnderi ol TOP-10-dyqty túıindep tur.