Taldyqorǵan qalasyndaǵy Bıken Rımova atyndaǵy drama teatrda qazaq sahna ónerindegi juldyzdy jup, Qazaqstannyń eńbek sińirgen qaıratkeri Kendebaı Temirbaıuly men Qazaqstannyń halyq artısi Almahan Kenjebekovanyń 75 jyldyq mereıtoıyna arnalǵan «О́nerde – 50, ómirde – 75» atty shyǵarmashylyq kesh ótti, dep jazady Egemen.kz.
Keshke oblys ákimi Beıbit Isabaev jáne Tuńǵyshbaı Jamanqulov, Nurqanat Jaqypbaı, Darıǵa Turanqulovalar bastaǵan ónerdegi áriptesteri, zııaly qaýym ókilderi men ónersúıer jurtshylyq qatysty.
Kesh qonaqtary sahna sańlaqtarynyń shyǵarmashylyǵyna arnalǵan kórmeni aralady. Onda sahnalyq kıimderi, spektaklderdegi rólderinen fotosýretter, ónerlerine qatysty basqa da buıymdar qoıyldy.
Sahnada quttyqtaý sóz sóılegen Beıbit Isabaev qazaq óneriniń damýyna ólsheýsiz úles qosqan qos sańlaqtyń ómir joly men shyǵarmashylyqtaǵy eńbegin erekshe atap ótti.
«О́nerde de, ómirde de taǵdyr joly toǵysqan sahna sańlaqtary kóp emes. Sol az shoǵyrdyń ishinde sizderdiń esimderińizdi biz árdaıym qurmetpen ataımyz. Sizderdiń ómir joldaryńyzdy Bıken Rımova atyndaǵy teatrdan bólip qaraý múmkin emes. Eń alǵash osy teatrdyń irgetasyn qalasyp, sahna shymyldyǵyn ashqan, taban aýdarmaı jarty ǵasyr boıy ónerge qyzmet etip kele jatqan sizderge jetisýlyqtardyń atynan erekshe rızashylyǵymdy bildiremin», dedi Beıbit Isabaev.
Keshte Abaı atyndaǵy opera jáne balet teatrynyń ónerpazdary, «Il-Kanto» kvarteti, «Qońyr» toby ánnen shashý shashty. Jetisýlyq óner ujymdary ártisteriniń oryndaýynda Almahan Nurpeıisqyzynyń óleńderi oqylyp, «Dánesh aǵa», «Farıza», «Qyzyma» sekildi birqatar ánderi oryndaldy. Qos akter túsken «Kóshpendiler», «Bir ýys bıdaı», basqa da fılmderden, telehabarlardan úzindiler berildi.
Eske salsaq, qos akter Sholpan Jandarbekovanyń synybyn bitirip, alǵashqy eńbek jolyn jańa qurylǵan Taldyqorǵan teatrynda bastap, elý jyl sahnaǵa adal qyzmet etip keledi. Teatr ujymy ótkizgen bul mereıtoılyq is-shara ulttyq sahna óneriniń damýyna zor úles qosqan maıtalman tulǵalardy dáripteý, olardyń baı shyǵarmashylyq murasyn keıingi urpaqqa nasıhattaý jáne jas akterlerge ónege etýdi maqsat etedi.