Aımaqta Úkimet basshysy Oljas Bektenovtyń qatysýymen Astanada jyl saıyn ótetin KGIR-2025 – Jahandyq ınvestısııalar boıynsha dóńgelek ústel ótti, dep jazady Egemen.kz.
Forýmnyń taqyryby – «Transformasııa dáýirindegi jańa sheshimder: Qazaqstan – ornyqty ekonomıkalyq damýdyń ortalyǵy». Forýmǵa álemniń 55 memleketinen 1 000-nan asa ókili qatysty. Bas qosý ınvestısııa tartý salasyndaǵy negizgi baǵyttardy – ınfraqurylym, ónerkásip, energetıka, joǵary tehnologııalar jáne jasyl ekonomıka salalaryn talqylaýǵa arnalǵan alańǵa aınaldy.
Atalǵan is-shara aıasynda Ulytaý oblysynyń ákimi Dastan Ryspekov oblys ekonomıkasyna ınvestısııa salýǵa daıyn ınvestorlarmen birqatar kezdesý ótkizdi. Kezdesý barysynda oblys ákimi qatysýshylarǵa óńirdiń ınvestısııalyq ahýaly týraly aqparatty tanystyrdy.
KGIR-2025 alańynda oblys ákimdigi Harvest Agro Holding (Shveısarııa), Chengdu Sepmem Energy (QHR), BKN Techbuild (QHR) jáne Sairen Group (QHR) kompanııalarymen jalpy somasy 150 mln dollardan asatyn yntymaqtastyq týraly memorandýmdar jasasty. Memorandým aýyl sharýashylyǵyn, qurylys pen energetıkany damytýǵa baǵyttalǵan.
Atalǵan ınvestısııalyq jobalardy iske asyrý jańa perspektıvaly salalardy iske qosýǵa jáne sol arqyly óńir ekonomıkasyn ártaraptandyrýdy qamtamasyz etýge múmkindik beredi.