OpenAI kompanııasy ChatGPT qyzmetine jańa shekteýler engizdi. Endi neırojeli medısına, quqyq jáne qarjy salalary boıynsha naqty keńes usynbaıdy, dep jazady Egemen.kz.
Onyń ornyna jalpy qaǵıdattardy túsindirip, mehanızmderdi sıpattaıdy. Qoldanýshylardy salanyń mamandaryna dárigerge, zańgerge nemese qarjylyq keńesshige júginýge úndeıdi.
Jańa erejelerge sáıkes, ChatGPT dári-dármek resepin, preparattardyń ataýlaryn jáne dozalaryn usynbaıdy. Sondaı-aq sot talaptarynyń úlgilerin nemese ınvestısııalyq josparlardy daıyndap bermeıdi.
OpenAI-dyń bul sheshimi paıdalanýshylardyń qaýipsizdigin arttyryp, JI-diń kásibı keńes berýshi rólin almastyra almaıtynyn túsindirýge baǵyttalǵan.