Memleket basshysy Qasym-Jomart Toqaev ishki saıasatymyzdyń negizgi qaǵıdattary, qundylyqtary men baǵyttaryn bekitý týraly qujatqa qol qoıdy. Atalǵan máseleni Ulttyq quryltaı músheleri, Májilistegi áriptesterim – A.Sarym, E.Jańbyrshın, N.Shatalov pen bir top qoǵamdyq saıası bilikti sarapshylar Býrabaıdaǵy otyrysta kótergen bolatyn.
Árıne, bul qujat qoǵamdy memleket quraýshy negizgi qaǵıdattarǵa biriktiretin mańyzdy bastama. «Ádiletti Qazaqstan» ıdeıasyn ulttyń basty muraty dep bekitken bul qujat memleketti ádil basqarý júıesin qalyptastyryp, eldigimizdi nyǵaıtyp, azamattardyń quqyqtaryn qorǵaýǵa bastamashy bolary sózsiz.
Ishki saıasattyń basty maqsaty – el birligin saqtaý jáne turaqty damýdy qamtamasyz etý. Bul maqsatty júzege asyrý úshin, ıaǵnı «Zań men tártip», «Halyq únine qulaq asatyn memleket», «Ártúrli kózqaras – birtutas ult», «Kúshti Prezıdent – yqpaldy Parlament – esep beretin Úkimet», «Adal azamat» jáne «Taza Qazaqstan» atty negizgi alty qaǵıdat bekitilip otyr. Bul qaǵıdattar rýhanı hám saıası turǵyda jańa qoǵamnyń irgetasyn myqtap berýge tıis. Qujatta táýelsizdik pen otanshyldyq, birlik pen yntymaq, ádildik pen jaýapkershilik, eńbekqorlyq pen kásibı biliktilik, jasampazdyq pen jańashyldyq qazaq qoǵamynyń rýhanı kody retinde sıpattalǵan. Bul qundylyqtar bir jaǵynan dástúrli uǵymdarǵa súıense, ekinshi jaǵynan zamanaýı kózqarasty talap etedi. Iаǵnı ulttyq sana men jahandyq órkenıettiń ózara úılesimin qalyptastyrý jańa saıasattyń basty mıssııasy.
Bizdiń oıymyzsha, «Ádiletti Qazaqstan» uǵymyna tek saıası uran turǵysynan qaraýǵa bolmaıdy. Kerisinshe, elimizdiń ishki saıası mádenıetin jańǵyrtýdyń, ádil ári ashyq qoǵam qurýdyń jańa paradıgmasy dep tanýǵa tıispiz. Iаǵnı ishki saıasattyń qaǵıdattary azamattyń adaldyǵy, bıliktiń ádildigi jáne qoǵamnyń birligi syndy úsh ustyndy el damýynyń basty kúshi eterine senim mol. Sonda ǵana «Ádiletti Qazaqstan» uǵymy tek memlekettiń bolashaǵy emes, árbir azamattyń arman-maqsatyna, órkenıetti ult bolýǵa degen seniminiń tuǵyryna aınalary sózsiz.
Elnur Beısenbaev,
Májilis depýtaty