Jambyl aýdanynda barlyǵy 65 mektep jumys isteıdi, onyń ishinde 51-i – orta, 6-y – negizgi jáne 8-i – bastaýysh mektep. Aýdan aýmaǵynyń keńdigi men keıbir aýyldardyń shalǵaı ornalasýyn eskere otyryp, orta mektebi joq eldi mekenderdiń oqýshylary kórshi aýyldarǵa jetkiziledi.
Aýdandyq bilim bólimi bas mamany Svetlana Súleımenovanyń aıtýynsha, búginde oqýshylardy tasymaldaý 12 mektepte uıymdastyrylǵan. Bul maqsatta 13 avtobýs jumyldyrylǵan, olarmen kún saıyn 264 bala mektepke baryp keledi. Mektep avtobýstary oqýshylardy tek aýyldyq okrýgterden ǵana emes, baý-baqsha aýmaqtarynan da tasymaldaıdy. Mysaly, Úlken aýylynyń mektebine kún saıyn «Energetık» baý-baqsha seriktestiginen 9 oqýshy keledi, al Qasymbek aýylyndaǵy mektepke «Turar» aýmaǵynan 25 bala qatynaıdy. Budan bólek, óz aýylynda mektep joq balalar Kútpanbetuly atyndaǵy mektepke (21 oqýshy), Qarasaı negizgi mektebine (30), Tanbalytas (10) jáne Suńqar (41) aýyldarynyń mektepterine jetkiziledi. Úmbetáli aýylyndaǵy mektepke Sholaqqarǵaly aýylynan 22 oqýshy keledi, onda tek negizgi mektep jumys isteıdi.Oqýshylardy tasymaldaýǵa qaýipsizdik talaptaryna tolyq saı keletin zamanaýı Golden Dragon markaly avtobýstar paıdalanylady. Barlyq bala avtobýsta turmaı, otyrǵyzylady, jol qaýipsizdigi men tártipti synyp jetekshileri baqylaıdy.
Ata-analar memleket tarapynan jasalyp otyrǵan mundaı qamqorlyqqa rızashylyqtaryn bildirýde.
«Balalarym úshin kóńilim tynysh. Avtobýs taza, jyly, tehnıkalyq jaǵdaıy jaqsy, júrgizýshi de tájirıbeli ári muqııat», deıdi Shıen aýylynyń turǵyny Áıgerim Abdýahatova.
Al Áıgerim Kúlshinbaevany balalardy tasymaldaý jumysynyń joǵary deńgeıde uıymdastyrylǵany qýantypty.
«Biz, ata-analar, balalarymyzdyń zamanaýı avtobýstarmen qaýipsiz júrip-turǵanyn kórip otyrmyz. Júrgizýshiler de jol erejelerin qatań saqtaıdy. Memleketke ósip kele jatqan urpaqqa degen qamqorlyǵy úshin alǵys aıtamyz», dep aǵynan jaryldy.
Qazir mektepke tasymaldaý júıesi – sapaly bilimge teń qoljetimdilikti qamtamasyz etýge baǵyttalǵan memlekettik saıasattyń mańyzdy bóligi. Osyndaı sharalardyń arqasynda ár bala, turǵylyqty jerine qaramastan, qaýipsiz ári jaıly jaǵdaıda bilim alýǵa múmkindik alyp otyr. Bul – el bolashaǵyna memleket tarapynan kórsetilgen naqty qamqorlyqtyń aıǵaǵy.
Almaty oblysy