Qazaqstan Respýblıkasynyń Jasandy ıntellekt jáne sıfrlyq damý mınıstrligi men Oracle kompanııasy jasandy ıntellekt, joǵary ónimdi esepteýler jáne «bultty» tehnologııalar salalaryndaǵy yntymaqtastyqty damytýǵa baǵyttalǵan ózara túsinistik týraly memorandýmǵa qol qoıdy, dep habarlaıdy Egemen.kz.
Qol qoıý rásimi Vashıngtonda AQSh - Ortalyq Azııa elderi arasyndaǵy óńirlik yntymaqtastyqty keńeıtý, ekonomıkalyq jáne tehnologııalyq damýdy qoldaýǵa baǵyttalǵan C5+1 formatyndaǵy bıznes-konferensııa barysynda ótti.
Memorandým aıasynda taraptar Qazaqstanda Oracle kompanııasynyń pılottyq JI-ınfraqurylymyn ornalastyrý múmkindigin baǵalaýǵa jáne tıisti testileýler júrgizýge qoldaý kórsetý, bultty derekter ortalyqtaryn kezeń-kezeńimen damytý áleýetin zertteý, sondaı-aq qoldanbaly jasandy ıntellekt boıynsha pılottyq jobalardy júzege asyrý baǵytynda yntymaqtastyq ornatýdy josparlap otyr.
Sondaı-aq yntymaqtastyq aıasynda kadrlyq áleýetti damytýǵa baǵyttalǵan arnaıy oqý jáne sertıfıkattaý baǵdarlamalary, birlesken ǵylymı-zertteý jobalary, Qazaqstanda Oracle quzyretter ortalyǵyn qurý máseleleri qarastyrylýy múmkin. Taraptar jasandy ıntellektini damytýdaǵy retteý jáne etıkalyq máseleler boıynsha dıalogty jalǵastyrýǵa nıetti.
Jaslan Mádıev, Qazaqstan Respýblıkasy Premer-mınıstriniń orynbasary – Jasandy ıntellekt jáne sıfrlyq damý mınıstri:«Oracle kompanııasymen yntymaqtastyq Qazaqstannyń ulttyq jasandy ıntellekt ınfraqurylymyn jáne sıfrlyq ekojúıesin damytýǵa yqpal etedi. Bul elimizdiń sıfrlyq ekonomıkasyn qalyptastyrý úshin berik negiz qurý jáne tehnologııalyq ınnovasııalardy ilgeriletý jónindegi bizdiń ustanymymyzdy kórsetedi».
Ellıson O’Braıen, Oracle kompanııasynyń memlekettik organdarmen jumys jónindegi basqarýshy dırektory: «Oracle Qazaqstannyń jasandy ıntellektige qatysty ulttyq strategııasyn iske asyrýdy qoldaýǵa daıyn. Bizdiń tehnologııalar men saraptamalyq tájirıbemiz sıfrlyq transformasııany jedeldetýge jáne ártúrli salalarda ınnovasııalardy yntalandyrýǵa kómektesedi».