Shalǵaıdaǵy aýyl mektebinen bastalǵan arman bıyl Alataýdyń eteginde úlken arenaǵa ulasty. Bir jyl boıy eldiń túkpir-túkpirinde ótken irikteý kezeńderinen sýyrylyp shyǵyp, aýyl namysyn qorǵaýǵa kelgen myńdaǵan jas sportshynyń jeńis joly óz máresine jetti.
Bul respýblıkalyq týrnır – aýyl balalary úshin mereke ǵana emes, jyldar boıǵy eńbektiń, tabandylyqtyń, armanǵa adaldyqtyń jarqyn nátıjesi.
Prezıdent Qasym-Jomart Toqaev bıylǵy Joldaýynda buqaralyq sportty damytýǵa erekshe basymdyq berdi. Memleket basshysynyń bastamasyn únemi qoldaıtyn Tımýr Qulybaevtyń Halyk qory «AUYL SPORT» týrnırin qatarynan ekinshi jyl ótkizip, myqtylardy anyqtady.
10 myń baladan myń júırik anyqtaldy
Joba jyl basynan beri 17 oblysty, 300-den asa aýyldy qamtydy. 10 myńnan astam jasóspirim baq synaǵan dodada 1700 eń úzdik sportshy fınalǵa joldama alyp, 3–6 qarashada Almatyda bas qosty. Olarǵa eldiń eń úzdik tóreshileri baǵa berdi.
Halyqaralyq deńgeıdegi fınal
Sportshylarǵa kásibı deńgeıde jaǵdaı jasalyp, olar ózin halyqaralyq arenada júrgendeı sezindi. Alańdar zamanaýı standartqa saı jabdyqtaldy, qatysýshylar tegin kıimmen, jatyn orynmen, tasymalmen qamtamasyz etildi.
«AUYL SPORT – aýyl balalarynyń bolashaǵyna salynǵan ınvestısııa. Fınalda tek chempıondar emes, búkil eldiń úmiti anyqtaldy. Bizge ár sportshynyń jaǵdaıyn jasaý basty basymdyqtardyń biri boldy, sondyqtan qor buǵan baryn saldy», – dedi Halyk qorynyń atqarýshy dırektory Ǵalymbek Jaqsylyquly.
Aıta keteıik, týrnırge bıyl tuńǵysh ret ústel tennısi engizilip, aýyl mektepterinde kásibı jattyǵý júıesi iske qosyldy. Bul óz nátıjesin berip, fınalda jańa chempıondar anyqtaldy.
Armanǵa jol ashqan doda
Jeńimpazdardyń biri dodadan qandaı áser alǵanyn bólisti.
«Men bul jarysqa aýyldyń kishi zalynan daıyndaldym. Fınalǵa kelgende ózimdi úlken arenada júrgen chempıondaı sezindim. AUYL SPORT meniń ómirimdi ózgertti», – dedi týrnır jeńimpazdarynyń biri.
Jarys alańynda tek sportshylar emes, olardyń ata-analary da tolqydy. Solardyń biri – Marat esimdi qatysýshynyń ákesi.
«Balamdy úlken arenada kórý baqyty buıyrdy. Qýanyshymda shek joq. Mundaı múmkindik syılaǵan qorǵa alǵysym sheksiz. Búgin bizdiń otbasyǵa ǵana emes, búkil aýylǵa mereıtoı. Endi halyqaralyq jarysqa bilek sybana kirisemiz», - dedi Marattyń ákesi ári jattyqtyrýshysy.
Jeńimpazdar óz eńbegimen aqshalaı marapatqa ıe boldy. Endigi baǵyt – halyqaralyq dúbirli dodalar. Aýyldyń ul-qyzdary endi álem sahnasyna bet aldy.
Aıta keteıik, buǵan deıin jobaǵa qatysqan sportshy Mahmet Jasulan jarystardyń birinde ájesine Olımpıada chempıony bolsa, Mekkege aparatynyn aıtyp, ýáde bergen edi. El sportyna qoldaý kórsetip kele jatqan mesenat Tımýr Qulybaev balanyń armanyn estip, onyń ájesine Mekkege qajylyq joldamasyn syılady. Bul - aýyl tárbıesiniń kúshi, adal sózdiń óteýi, jaqsylyqtyń jalǵasy.
«Búgin armanym oryndaldy. Qýanyshymda shek joq. Men úshin eń úlken qýanysh – ájemniń baqytty júzin kórý. Osyndaı múmkindik syılaǵan aǵalarǵa myń alǵys.Endigi maqsatym – dodalarda jeńiske jetý», - deıdi Mahmet Jasulan.
Jetistikke bastar jol
«AUYL SPORT» – aýyl jastaryna sport arqyly úlken armanǵa jol ashýǵa baǵyttalǵan Tımýr Qulybaev bastaǵan Halyk qorynyń mańyzdy jobasy. 2024 jyly bastaý alǵan baǵdarlama alǵash kúnnen-aq shalǵaıdaǵy myńdaǵan jasóspirimge úmit syılap, sportqa degen talpynysyn arttyrdy. Byltyr bir jyl ishinde 200 aýyldan 12 myńnan astam bala qatysyp, debıýt maýsym eldiń eń aýqymdy aýyl sport merekesine aınaldy. Almatyda ótken fınalda 1300 talantty sportshy jınalyp, tarıhı jarystyń bir bóligi boldy.
Bastama nátıjesi de uzaq kúttirmedi. 2025 jylǵy kóktemde «AUYL SPORT» jeńimpazdary Qazaqstan quramasyna qosylyp, Serbııada ótken ISF U-15 Gımnazıadasyna jol tartty. Álemdik deńgeıdegi bedeldi baıraqty básekede Qazaqstannan barǵan 22 jas sportshynyń 12-si – aýyl balalary. El quramasy jarysty 11 medalmen aıaqtap, bıik nátıjege qol jetkizdi. Onyń tórt medalin aýyl sportshylary jeńip alyp, aýylda týyp-ósken talanttardyń múmkindigi sheksiz ekenin dáleldedi.