Saýd Arabııasynyń astanasy Er-Rııadta WTA-nyń qorytyndy týrnıri aıaqtaldy. Jarysta baq synaǵan elimizdiń eń úzdik tennısshisi E.Rybakına asqan sheberligimen mıllıondaǵan kórermendi tánti etip, bas júldeni oljalady. Elenany osynaý tolaıym tabysymen Memleket basshysy Q.Toqaev arnaıy quttyqtady.
Týrnırde Elenanyń joly kil myqtylarmen qıysty. Tusaýkeser kezdesýinde WTA tiziminde tórtinshi orynda turǵan Amanda Anısımovamen aıqasty. AQSh tennısshisiniń bıyl US Open men Ýımbldon dodalarynyń fınalynda oınaǵanyn eskersek, ol Er-Rııadqa jaqsy babynda keldi dep aıtýǵa tolyq negiz bar. Desek te jerlesimiz Anısımovany bet qaratpaı utty – 6:3, 6:1.
Kelesi oıynda otandasymyz Iga Shvıontekpen sheberlik baıqasty. Álemniń eks-birinshi raketkasy Rolan Garrosta tórt márte top jaryp, US Open men Ýımbldondy bir-bir retten utqanyn jankúıerler jaqsy biledi. Qazir WTA reıtınginde ekinshi orynda tur. Birinshi set polıak qyzynyń paıdasyna sheshildi – 6:3. Esesine qarqynyn kúrt kúsheıtken Rybakına kelesi setterde Shvıontektiń tas-talqanyn shyǵardy – 6:1, 6:0.
Toptyq týrnırdegi sońǵy matchyn Elena amerıkalyq Medıson Kızge qarsy ótkizýge tıis edi. Alaıda densaýlyǵynyń syr berýine baılanysty qarsylasy kortqa shyǵýdan bas tartty. Ony reseılik Ekaterına Aleksandrova almastyrdy. Rybakına TOP-10-dyqty túıindep turǵan oıynshynyń osal tusyn ońaı tapty – 6:4, 6:4.
О́z tobynda birinshi oryn alǵan otandasymyz jartylaı fınalda Djessıka Pegýlamen sheberlik baıqasty. Byltyr US Open týrnıriniń fınalyna deıin jetken AQSh ókili bul kúnderi álemdik reıtıngte besinshi orynǵa taban tirep tur. Alaıda ol da E.Rybakınaǵa jarytyp qarsylyq kórsete almady – 4:6, 6:4, 6:3.
Fınalda jerlesimizdiń joly búginde tórtkúl dúnıeniń teńdessizi dep tanylǵan Arına Sobolenkomen qıysty. Belarýstiń betkeustary «Úlken dýlyǵa» sanatyndaǵy jarystardyń tórt dúrkin jeńimpazy atanyp, WTA dodalarynda 21 ret top jardy. Osydan úsh jyl buryn Arına WTA-nyń qorytyndy týrnıriniń fınalynda óner kórsetken. Biraq sheshýshi oıynda fransııalyq Karolın Garsııaǵa ese jibergen edi. Bul joly Elena da azýly qarsylasynyń ataǵynan qaımyqqan joq. Búkil match boıy óte senimdi oınaǵan Rybakına 6:3, 7:6 esebimen Sobolenkoǵa san soqtyryp, bas júldeni oljalady.
Elena Rybakına Er-Rııadtaǵy jeńisinen keıin WTA-nyń qorytyndy týrnırinde top jarǵan elimizdiń tuńǵysh tennısshisi retinde tarıhta qaldy. Sonymen qatar onyń esimi Azııa qurlyǵynan osyndaı deńgeıge jetken tuńǵysh oıynshy retinde de sporttyq shejirege altyn áriptermen jazyldy. Esterińizge sala keteıik, Elenaǵa deıin 2013 jyly Lı Na (Qytaı), 2024 jyly Sınven Chjen (Qytaı) bas júldege talasyp, ekeýi de sheshýshi saıysta utylǵan edi. Osy tabysynyń arqasynda elimizdiń birinshi raketkasy uıymdastyrýshylar tarapynan 5,235 mıllıon AQSh dollary kóleminde syıaqy aldy. Sondaı-aq 1500 upaı alyp, WTA reıtınginde altynshy orynnan besinshi orynǵa kóterildi.