Shymkent qalasynda áleýmettik osal sanattaǵy azamattardy qoldaý maqsatynda 99 turǵynǵa 400 AEK-ke deıingi (1 572 800 teńge) qaıtarymsyz grant berildi. Memlekettik qoldaýdyń III leginde jalpy 398 ótinim qabyldanǵan, dep habarlaıdy Egemen.kz qalanyń baspasóz qyzmetine silteme jasap.
Komıssııanyń oń sheshimin alǵandardyń qatarynda 52 jeke kásipker, 47 jumyssyz azamat bar. Qalada jyl basynan beri jalpy sany 432 adam qaıtarymsyz grant alǵan. Jeńimpazdardyń basym bóligi áleýmettik osal toptardan: kóp balaly 55 otbasy, múgedektigi bar 21 azamat, 17 erekshe balany tárbıelep otyrǵan ata-ana, asyraýshysynan aırylǵan 5 adam jáne 1 ataýly áleýmettik kómek alýshy.Jańa jobalar osy memlekettik qoldaýdyń kómegimen qala ekonomıkasyn damytýǵa jáne jumys oryndaryn qurýǵa óz úlesin qosady dep kútilýde.
Aıta keteıik, grantqa ótinishter enbek.business.kz portaly arqyly qabyldanady. Úmitkerler óz bıznes-jobalaryn onlaın tirkep, keıin komıssııa aldynda qorǵaıdy.Granttardyń basty maqsaty – azamattardy kásipkerlikke yntalandyrý, jańa jumys oryndaryn ashý jáne ekonomıkany damytý. Memleketten berilgen qarjy qaıtarymsyz bolǵanymen, onyń maqsatty jumsalýy qatań baqylanady. Eńbek mobıldiligi ortalyǵynda arnaıy monıtorıng toby jumys istep, jobalardyń iske asýyn qadaǵalaıdy. Eger qarjy maqsatsyz jumsalsa, ol memleketke qaıtarylady.