Shymkent qalasynda turǵyndardyń pikiri men ótinish-tilegine qulaq túretin jańa joba qolǵa alyndy. «Shymkentti damytýǵa halyqtyń úlesi» dep atalatyn osy joba aıasynda adamdar QR kodtqa óz ótinishin nemese shaǵymyn qaldyra alady. Usynystaryn da bildirýge bolady, dep jazady Egemen.kz.
Jaýapty sala mamandary, ákimdiktiń joǵary laýazymdy qyzmetkerleri turǵyndarmen kezdesýde usynys-pikirlerin tyńdap jatady. Endi halyq atqarýshy bılik ókilderimen kezdespeı-aq kez kelgen máselege qatysty oıyn osy QR kod arqyly bildire alady.
QR-kodtar aldaǵy ýaqytta qoǵamdyq oryndar men avtobýstarǵa ornatylady. Sol arqyly azamattar qalany damytýǵa baılanysty ıdeıalaryn QR-kodpen op-ońaı joldaıdy.
Qala ákimdigi mamandarynyń sózinshe, bul joba árbir turǵynǵa Shymkenttiń damýyna jeke úles qosyp, oń ózgeristerge sebepshi bolýǵa múmkindik beredi. Túsken barlyq usynys muqııat zerdelenip, ishindegi ózekti degenderi naqty júzege asyrylady.
Osylaısha, joba ákimdik pen halyq arasyndaǵy ashyq dıalogty nyǵaıtýǵa jáne qalany kórkeıtýge baǵyttalǵan ıgi qadam bolyp otyr.