Túrkistan oblysynda 20 qazan men 19 qarasha aralyǵynda brakonerlikti boldyrmaý, bıologııalyq resýrstardyń zańsyz aınalymyn anyqtaý jáne onyń aldyn alý maqsatynda júzege asyrylyp jatqan "Brakoner" jedel-profılaktıkalyq is-sharasynyń 22 táýligi ishinde 2 qylmystyq quqyq buzýshylyq jáne tabıǵatty qorǵaý zańnamasyn buzýdyń 212 deregi anyqtaldy, dep jazady Egemen.kz.
Polısııa departamenti qoǵamdyq qaýipsizdik basqarmasynyń tabıǵatty qorǵaý jáne qarý aınalymyn baqylaý tobynyń ınspektory Ǵalymjan Arystanbekulynyń málimdeýinshe, ańshylyq jáne janýarlar dúnıesin paıdalaný erejelerin buzǵany úshin 75 quqyq buzýshy ákimshilik jaýapkershilikke tartyldy.
Tirkelmegen qarýdy zańsyz ıemdený, saqtaý jáne alyp júrý boıynsha 24 qarý tárkilengen. Azamattyq jáne qyzmettik qarý aınalymy qaǵıdalaryn buzǵan 47 azamat anyqtalyp, jaýapkershilikke tartyldy. Sonymen qatar óńirde zańsyz balyq aýlaǵan 65 azamatqa shara qoldanylǵan. Máselen, Shardara aýdanynda quqyq buzýshylardan 100 kelige jýyq balyq, úrmeli eskek, rezeńke qaıyq jáne 300 metrge jýyq tyıym salynǵan monotalshyqty qytaı aýy tárkilendi.
Bul jáıt «Balyq resýrstaryn, basqa da sý janýarlaryn nemese ósimdikterdi zańsyz óndirý» boıynsha tirkelgen. Zattaı dáleldemeleri bar brakonerler polısııa bólimine jetkizildi. Qazirgi ýaqytta Shardara sý qoımasyndaǵy zańsyz balyq aýlaý deregi boıynsha sotqa deıingi tergeý amaldary júrgizilýde.
Túrkistan oblysy