Bıyl 1 qarashaǵa deıin Memlekettik áleýmettik saqtandyrý qory jumysynan aıyrylǵan 308,4 myń adamǵa áleýmettik tólem aýdardy. Olardyń arasynda 268,6 myń adamǵa tólem alǵash ret taǵaıyndaldy. Tólemderdiń jalpy somasy 106,8 mlrd teńge.
Qoldanystaǵy zańnamaǵa sáıkes jumystan bosatylǵan azamattar mindetti áleýmettik saqtandyrý júıesine qatysý ótiline, sondaı-aq keıingi eki jyldaǵy tabysyna baılanysty 6 aıǵa deıin jumysynan aıyrylýyna baılanysty áleýmettik tólemder alady. Tólem joǵalǵan kiristiń 45%-yna deıingi mólsherde MÁSQ qarajaty esebinen aýdarylady. Tólem taǵaıyndaý úshin jumystan bosatylǵan jumysker eGov.kz portalynda avtorızasııadan ótýge tıis. «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaıdy. Onlaın-qyzmetke tapsyrys berip, qajetti málimetterin júktep, ESQ arqyly qol qoıyp, ótinimdi jiberýi qajet. Jumysynan aıyrylǵan azamat ótinish joldaǵannan keıin bir kún ishinde turǵylyqty jerindegi mansap ortalyǵy bos jumys oryndaryn usynady. Eger jumys tabylmasa, 3 jumys kúni ishinde qashyqtyqtan jumyssyz mártebesin alady. Bul qyzmetti onlaın rejimde Elektrondyq eńbek bırjasy (enbek.kz) arqyly da alýǵa bolady.
Jumyssyz retinde tirkelý týraly málimetterdi Eńbek jáne halyqty áleýmettik qorǵaý mınıstrliginiń aqparattyq júıesi proaktıvti formatta qaraıdy. MÁSQ-tan tólemdi taǵaıyndaýǵa jumysynan aıyrylǵan azamattyń kelisimin alý úshin mobıldi telefonǵa SMS-habarlama jiberedi. Kelisken jaǵdaıda SMS-habarlamaǵa jaýap berý qajet. Tólem avtomatty túrde taǵaıyndalady.
MÁSQ qarajaty esebinen jumystan aıyrylǵan jaǵdaıda tólenetin áleýmettik tólem jumystan shyǵý sebepterine qaramastan júzege asyrylady.