D. Serikbaev atyndaǵy Shyǵys Qazaqstan tehnıkalyq ýnıversıtetinde «AI-Sana: EKTU Demo Day» atty kúzgi forým ótti. Is-shara ulttyq AI-Sana baǵdarlamasy aıasynda, Ǵylym jáne joǵary bilim mınıstrligi men Shyǵys Qazaqstan oblysynyń Sıfrlandyrý jáne arhıvter basqarmasynyń qoldaýymen uıymdastyryldy, dep habarlaıdy Egemen.kz.
AI-Sana – jas zertteýshilerdi, stýdentterdi jáne ındýstrııa mamandaryn biriktirip, jasandy ıntellekt tehnologııalaryn qoldanatyn ınnovasııalyq sıfrlyq sheshimder ázirleýge múmkindik beretin biregeı platforma. Baǵdarlama jobalyq mádenıetti damytýǵa, perspektıvaly ıdeıalardy qoldaýǵa jáne jasandy ıntellektini belsendi qoldanatyn Qazaqstannyń jańa tehnologııalyq kóshbasshylaryn daıarlaýǵa baǵyttalǵan.
Forýmda stýdenttik jobalar qorǵaldy, salmaqty oı, utymdy usynystar aıtyldy. Stýdentter túrli saladaǵy úderisterdi jaqsartýǵa jáne ómir sapasyn arttyrýǵa baǵyttalǵan praktıkalyq jobalardyń keń spektrin usyndy. Atap aıtsaq, «AgroLink» aýyl sharýashylyǵy ónimderin tikeleı jetkizýge arnalǵan sıfrlyq B2B platformasy. Keste boty – oqý úderisin uıymdastyrýǵa arnalǵan ıntellektýaldy kómekshi. «ColorJudge» – marketıng pen dızaınǵa arnalǵan beıneanalız júıesi. «Dravon» – marketpleısterden baǵalardy jınaqtaıtyn smart-agregator. «Eye Tracking» – balalardaǵy aýtızm spektri buzylystaryn erte anyqtaýǵa arnalǵan JI júıesi, «TagamCaloriScanAI» – tamaq ónimderiniń kalorııasyn baqylaýǵa jáne durys tamaqtaný ádetterin qalyptastyrýǵa arnalǵan qosymsha, taǵysyn taǵy.
Bul jobalar aýyl sharýashylyǵy, medısına, bilim, qaýipsizdik jáne áleýmettik salada jasandy ıntellektiniń naqty qoldanylý múmkindikterin dáleldeıdi. Eń mańyzdysy, JI tehnologııalarynyń áleýetin AI-Sana baǵdarlamasy boıynsha oqyǵan ýnıversıtet stýdentteri kórsetti.