Qazaqstanda alǵash ret iske qosylǵan Alem.Cloud ulttyq sýperkompıýteri halyqaralyq TOP500 reıtınginde 86-orynǵa kóterilip, álemdegi eń qýatty esepteý júıeleriniń qataryna kirdi, dep habarlaıdy Egemen.kz.
Memleket basshysynyń tapsyrmasy boıynsha Alem.Cloud sýperkompıýterlik klasteri Jasandy ıntellekt jáne sıfrlyq damý mınıstrligine qarasty «Ulttyq aqparattyq tehnologııalar» AQ ınfraqurylymy negizinde qurylǵan. Bul ınfraqurylym jasandy ıntellekt, úlken derekterdi taldaý baǵyttaryndaǵy jobalardy iske asyrýǵa arnalǵan.
Klasterdiń arhıtektýrasy joǵary tyǵyzdyqtaǵy biryńǵaı GPU-keshenine biriktirilgen 64 HPE Cray serveriniń bazasynda iske qosylǵan. Árbir esepteý toraby joǵary jyldamdyqty qamtamasyz etetin NVIDIA H200-ben jabdyqtalǵan.
Jobany júzege asyrýda Birikken Arab Ámirlikteriniń G42 tobyna kiretin Presight kompanııasy mańyzdy ról atqardy. Halyqaralyq seriktester Qazaqstandaǵy AI ekojúıesin damytýǵa arnalǵan ozyq tájirıbelerdi engizip, joǵary ónimdi esepteý klasterin jobalaý barysynda keshendi tehnıkalyq qoldaý kórsetti.
«Júıe joǵary petaflops dıapazonynda ónimdilikti qamtamasyz etedi jáne Qazaqstan men Ortalyq Azııa aımaǵyndaǵy eń qýatty esepteý platformasy bolyp sanalady. Sýperkompıýter baǵdarlamalyq jasaqtamasy SUSE Harvester (vırtýalızasııa jáne taratylǵan esepteýlerge arnalǵan jańa býyn gıpervızory), SUSE Rancher (Kubernetes pen AI-júktemelerin ortalyqtan basqarý platformasy) tehnologııalaryn qamtıdy. Klasterdiń qaýipsizdigin qamtamasyz etý úshin SUSE NeuVector (konteınerlik qaýipsizdik, jelilik baqylaý jáne rantaım-qorǵaý júıesi), Palo Alto Networks jelilik segmentasııa jáne kıberqaýipsizdik sheshimderi, sondaı-aq Thales krıptografııalyq jáne apparattyq shıfrlaý quraldary qoldanylady», delingen habarlamada.
«UAT» AQ mamandary halyqaralyq seriktestermen birlesip, HPL (Linpack) ádistemesi boıynsha keshendi testileý júrgizdi. Synaqtar júıeniń naqty esepteý múmkindikterin dáleldep, TOP500 reıtıngine tirkeýge daıyn ekenin kórsetti.