«Arlandar» «Baký ottarynan» basym tústi

ASTANA. 21 naýryz. Búgin «Astana arlandary» Búkilálemdik boks serııasy aıasynda Ázerbaıjannyń «Baký ottary» komandasyn qabyldady. Shymkentte ótken kezdesýde boksshylarymyz 4:1 esebimen jeńiske jetti. Bul týraly egemen.kz habarlady.

«Astana arlandary» – «Baký ottary» 4:1

52 kılo: Oljas Sáttibaev – Mýrad Rabadanov 3:0 (50:45, 50:45, 50:45) Alǵashqy jekpe-jekte «arlandar» sapynan rıngke Oljas Sáttibaev shyqsa, qarsy taraptan Mýrad Rabadanov judyryqtasty. Bes raýnd boıy basymdyq tanytqan qazaq boksshysy 3:0 esebimen jeńiske jetip, komandasynyń qorjynyna alǵashqy upaıdy saldy. 60 kılo: Zakır Safıýllın – Albert Selımov 0:3 (44:50, 44:50, 44:50) Ekinshi bolyp sharshy alańǵa Zakır Safıýllın men Albert Selımov kóterildi. Selımov komandasynda kóshbasshylardyń biri. Bıylǵy maýsymda óz salmaq dárejesi boıynsha WSB jobasynyń jekeleı reıtınginde kósh bastap keledi. Al Zakır úshin bul alǵashqy maýsym. Soǵan qaramastan bizdiń «arlan» laıyqty qarsylyq kórsetti. Alǵashqy raýndtar ázerbaıjannyń basymdyǵymen ótse de, sheshýshi sátterde Safıýllın aıanyp qalmady. Alaıda, tájirıbeniń arqasynda bul aıqasta Selımov 3:0 esebimen jeńiske jetip, jalpy esepti teńestirdi. 81 kılo: Hrvoe Sep – Mıhaıl Dolgoleves 3:0 (50:44, 50:44, 50:44) «Astana arlandary» sapyndaǵy horvatııalyq legıoner Hrvoe Sep pen qarsylasy Mıhaıl Dolgoleves arasyndaǵy jekpe-jek bizdiń boksshynyń aıqyn basymdyǵymen ótti. Barlyq kezeńde tizgindi óz qolynda ustaǵan Sep tartysty qalaýynsha ótkizdi. Nátıjesinde, tóreshiler biraýyzdan jeńisti «arlanǵa» berdi (3:0). 69 kılo: Qanaǵat Maralov – Parvız Bagırov 2:1 (49:46, 48:47, 46:49) Búkilálemdik boks serııasyndaǵy alǵashqy jekpe-jegin ótkizgen «arlanymyz» Qanaǵat Maralov bizdiń komandaǵa merziminen buryn jeńis syılady. Qarsylasy Parvız Bagırov ekeýiniń aıqasy teń dárejede órbidi. Kezdesý sońynda tóreshiler 2:1 esebimen jeńisti qazaq boksshysyna berdi. +91 kılo: Fılıp Hrgovıch – Gadjı Mýrtýzalıev TKO (R1) Al sońǵy asa aýyr salmaqtaǵy boksshylardyń jekpe-jegi bir raýndtan uzaqqa sozylmady. Hrvoeniń otandasy, «arlanymyz» Fılıpp Hrgovıch pen ázerbaıjandar senim artqan Gadjı Mýrtýzalıev arasyndaǵy aıqasta tóreshiler jeńisti bizdiń boksshyǵa berdi. Birinshi raýndtyń aıaqtalýyna 30 sekýnd qalǵan kezde qazylar Mýrtýzalıevke qatań eskertý jasap, tartysty toqtatty. Nátıjesinde, Hrgovıchtiń paıdasyna tehnıkalyq nokaýt jazyldy. Osylaısha «arlandar» bıylǵy maýsymda 10-jeńisterine qol jetkizip, 30 upaımen «V» tobynda jeke-dara kósh bastady. Alǵashqy aınalymda Ázerbaıjan komandasyn Bakýde 3:2 esebimen jeńgenimizdi aıta keteıik. Komandamyzdyń kelesi qarsylasy «AQSh nokaýtshylary». Marat Jákıev jattyqtyratyn «arlandar» bul aıqasty 27 naýryzda AQSh-ta ótkizedi. Amerıkalyq bokshylar «V» tobynda 19 upaımen úshinshi orynda tur. Elaman Qońyr. Derek: egemen.kz. Sýret: worldseriesboxing.com.