Astanada armıan halqynyń oıshyly ári aǵartýshysy Mesrop Mashtostyń atyna kóshe berildi. Ol elordanyń sol jaǵalaýyndaǵy Qabanbaı men Turan kósheleriniń ortasynda ornalasqan. Uzyndyǵy – 750 metr.
Kósheniń ashylý rásimine Qazaqstan Respýblıkasy Premer-mınıstriniń orynbasary – Ulttyq ekonomıka mınıstri Serik Jumanǵarın, Armenııa Respýblıkasynyń vıse-premeri Mger Grıgorıan, QR Mádenıet jáne aqparat mınıstri Aıda Balaeva, Armenııa Respýblıkasynyń Bilim, ǵylym, mádenıet jáne sport mınıstri Janna Andreasıan, armıan dıasporasynyń ókilderi, qoǵam qaıratkerleri qatysty.
Eske salsaq, Astanada Mesrop Mashtos atyndaǵy kósheniń ashylatyny týraly alǵash ret Memleket basshysy Qasym-Jomart Toqaevtyń 2024 jylǵy sáýirde Erevanǵa jasaǵan resmı sapary barysynda jarııalanǵan edi.
Saltanatty jıynda Aıda Balaeva kósheniń ashylýy eki halyqtyń dostyq, ózara mádenı birlikti nyǵaıtýǵa degen umtylysynyń jańa rámizi ekenin aıtty.
– Is-shara – armıan halqyna degen qurmetimiz ben dostyq peıilimizdiń belgisi. Osy jyldyń sáýir aıynda Erevanda qazaqtyń uly aqyny Abaı Qunanbaıuly atyndaǵy saıabaq ashyldy. Endi ol jerde oıshyldyń qundy murasy ulyqtalady. Qazaqstanda Mesrop Mashtostyń esimi berilgen kósheni ashý arqyly biz osy ıgi qadamǵa qurmetpen jaýap berip, rýhanı mura – mádenıetterimiz qos ózenniń saǵasyndaı toǵysatyn, bir-birin baıyta túsetin keńistik ekenin taǵy bir dáleldeımiz, – dedi A.Balaeva.
Mesrop Mashtos – Armenııa búginge deıin qoldanatyn 36 áripten turatyn álippeni jasap, sol ulttyń tilin, mádenıetin damytýǵa eleýli úles qosqan tulǵa. Janna Andreasıan armıan ǵalymynyń esimin ulyqtaý halyqtardyń ózara qurmeti men dostyǵy, mádenı yntymaqtastyǵy tarıhyndaǵy jańa beles ekenin atap ótti.
– Erevanda Abaı saıabaǵynyń, endi mine, Astanadaǵy Mashtos kóshesiniń ashylýy eki el mádenıetin jalǵaǵan kópir ispetti. Bul kópir arqyly tek uly tulǵalardyń esimderi emes, beıbitshilik pen bilim, shyǵarmashylyq pen dostyq sııaqty ortaq qundylyqtar da urpaqtan-urpaqqa taraıdy. Armenııa men Qazaqstan – tarıhy tereń, uly oıshyldarynyń rýhanı murasyn ulyqtap, keleshekke umtylǵan memleketter. Eki el arasyndaǵy yntymaqtastyq qashanda bir-birin tolyqtyryp, baıytyp otyratyn seriktestikke negizdelgen. Sondyqtan Mashtos kóshesiniń ashylýy bizdiń mádenı jáne bilim salasyndaǵy baılanystarymyzdy jańa deńgeıge kóteretin mańyzdy qadam dep bilemin, – dedi Armenııa Respýblıkasynyń Bilim, ǵylym, mádenıet jáne sport mınıstri.
Is-shara Armenııa Premer-mınıstri Nıkol Pashınıannyń resmı sapary aıasynda ótti.